Arslan.mn

Боксын ОУХМ, МУГТ Э.Цэндбаатар энэ сарын 05-ны шөнө Боксын холбооны их хурлын дараа бусадтайгаа наргиж яваад бусдад зодуулсан гэх мэдээлэл гарсан билээ. Гэвч тэрээр дараа нь цагдаад ярьснаа үгүйсгэсэн, Боксын холбоо энэ асуудалд нь хариуцлага тооцон шигшээ багаас хөөж, ДАШТ-д оролцох бүрэлдэхүүнээс хассан гэх мэдээлэл тараад буй. Боксын холбооноос өнөөдөр дээрх асуудлаар мэдээлэл хийлээ.

Боксын холбооны үүрэг гүйцэтгэгч Ж.Энхтөр "Боксын тамирчид өндөр ёс зүйтэй байдаг. Э.Цэндбаатар олон удаагийн ёс зүйн алдаа гаргасан. Өмнө нь зөндөө уучилсан. Тамирчин хүн гавъяа байгуулахаас гадна зөв хүн болж төлөвшиж хүмүүжих шаардлагатай. Тиймээс боксын холбоо зөв зүйтэй шийдвэр гаргасан. Э.Цэндбаатарыг үлгэр дууриалал болгон бэлтгэл хийдэг олон залуу байдаг байсан. Гэтэл тэдэнд муу үлгэр дууриалал үзүүлээд байвал яах вэ. Ямар ч гавьяат, хөдөлмөрийн баатар байсан хариуцлага хүлээх хэрэгтэй. Цаашид илүү сахилга баттай байх биз. Тиймээс өчигдөр ийм шийдвэр гаргалаа. 

Шигшээ багийн тамирчин Э.Цэндбаатар шөнийн 02.00 цагт согтууруулах ундаа хэрэглэж зодоон хийж болохгүй. Өмнө нь бас бааранд зодоон хийсэн, багш дасгалжуулагчаа зодсон, гудамжаар шалдан нүцгэн явсныг та бүхэн мэдэж байгаа байх.  ДАШТ эхлэхэд хэдхэн хоног дутуу байхад Э.Цэндбаатар согтууруулах ундаа хэрэглэсэн маш том алдаа гаргалаа. Иймд шигшээ багаас хасахаар шийдвэрлэж байна" гэлээ. 

Удирдах зөвлөлийн гишүүн Э.Бадар-Ууган “УИХ-ын гишүүд, улс төрчид төрийн бус байгууллагын тэргүүнээр ажилладаг. Энэ дагуу холбооны ерөнхийлөгчид нэр дэвшсэн. Түүнтэй хамт Н.Энхболд тамирчин нэр дэвшсэн хэдий ч Х.Нямбаатарыг нэр дэвшиж байгаа тул дэмжин ажиллахаа илэрхийлж, нэрээ татсан. Х.Нямбаатартай өрсөлдөх хүн байгаагүй тул УЗ-ийн 19 гишүүний 100 хувийн саналаар сонгосон.

Мөн боксын тамирчид олимпоос медальгүй ирсэн. Үүнд ард түмнээсээ уучлалт гуйя. Э.Цэндбаатартай зодолдсон хүмүүс нь шигшээ багийн тамирчид биш гэдгийг хэлье. Бид зөвхөн шигшээ багийн тамирчнаа л мэдэж байна. Зодуулсан асуудлыг хуулийн байгууллага тусдаа шалгаж шийдвэрлэнэ" гэлээ.