Arslan.mn

Хөдөлмөр, нийгмийн зөвшлийн гурван талт үндэсний хороо 2018 оны 08 дугаар сард хуралдаж, 2019 оны 01 дүгээр сарын 01-ний өдрөөс хөдөлмөрийн хөлсний доод хэмжээг нэмэгдүүлэх шийдвэр гаргасан юм. Хуулийн дагуу хөдөлмөрийн хөлсийг хоёр жил тутам нэгээс доошгүй удаа шинэчлэн тогтооно гэсэн заалттай байдаг учир 2017 оноос эхлэн 240 мянгаар мөрдөгдөж байсан хөдөлмөрийн хөлсний доод хэмжээ 320 мянган төгрөг болон нэмэгджээ. 

Ийнхүү хөдөлмөрийн хөлсний доод хэмжээ нэмэгдсэн нь энэ мөнгөн дүнгээр цалинждаг иргэдэд ашигтай. Өөрөөр хэлбэл нийт ажил эрхлэгчдийн найман хувьд ашигтай гэсэн үг. Харин үлдсэн 92 хувь, мөн хувиараа хөдөлмөр эрхлэгчдийн хувьд халаасанд ордог мөнгө нь багасах заалт болжээ. 

Тухайлбал, сайн дурын нийгмийн даатгалын шимтгэл төлөгч хувиараа хөдөлмөр эрхлэгч, малчин, газар тариалан эрхлэгч, бичил уурхай эрхлэгч, чөлөөт уран бүтээлч, гадаад улсад ажиллаж, амьдарч буй иргэн, оюутан суралцагч, тодорхой хөдөлмөр эрхлээгүй иргэн зэрэг ордог.

Ажилгүй иргэдийн хувьд нийгмийн даатгалаа таслуулахгүйн үүднээс тохирох ажилд ортлоо хувиараа цалингийн доод хэмжээний шимтгэлийг төлдөг. Гэтэл өнгөрсөн жил сарын 31200 төгрөгөөр нийгмийн даатгалын шимтгэл төлж байсан эдгээр иргэдэд цалингийн доод хэмжээ нэмэгдсэнээр дарамт нэмэгдэж, энэ оноос эхлэн сард 43200 төгрөг болжээ. 

Энэ нь хувь хүний халааснаас 12000 төгрөг сар тутамд илүү авна гэсэн үг. Үүнийг бүтэн жилээр үржүүлбэл 144 000 төгрөг түрийвчнээс тань сох дутна гэсэн үг юм. 

Тэгэхээр хөдөлмөрийн хөлсний доод хэмжээг нэмэгдүүлэх шийдвэр сайн дурын нийгмийн даатгал төлөгчид, ажил эрхлэгчид гээд нийгмийн ихэнх хэсгийнхэнд эдийн засгийн дарамт болдог аж.