Arslan.mn

Сүүлийн үед хүмүүс хоорондоо текстээс гадна олон янзын эможи, стикер, GIF ашиглан харилцах болсон. Олон төрлийн дүрсийг ашиглан хялбар бөгөөд сонирхолтой байдлаар харилцах нь харилцааг илүү зугаатай, илүү дотно болгодог. Зөвхөн цаанаас санал болгодог бэлэн эможинуудаас илүү өөрийн гэсэн эможиг бүтээн хуваалцвал хүмүүсийг сэтгэлийг улам бүр л хөдөлгөх болов уу. Өнөөдөр ийн бүтээлч байхад тань туслах 4 апп-ийг танилцуулж байна.

FACEAPP

Энэ бол сүүлийн үед ихээхэн анхаарал татаж байгаа апп юм. Өөрийн царайг таниулан зураг авч, эсвэл өмнө авсан зургаа эможи хэлбэр үрүү шилжүүлэн өөрчлөх боломжийг FaceApp танд олгоно. Царайгаа ууртай байдлаар, эрэгтэй, эмэгтэй, хөгшин хүн болгох зэргээр эможид байдаг янз бүрийн хэлбэр үрүү шилжүүлэн харах боломжтой. Мэдээж авсан зургаа үнэгүй хадгалах төдийгүй хүсвэл бусадтай хуваалцах, зургаа GIF хэлбэрээр хадгалах боломжтойгоороо онцлог юм. Давуу тал нь энэ төрлийн бусад апп-уудаас зургийг илүү бодит харагдуулж чаддаг. Хэрэв та хүсвэл илүү олон боломжийг багтаасан үнэтэй хувилбарыг нь худалдан авах боломжтой.

Татах: IOS, Android

BITMOJI

Энэ бол танд санал болгох олон хэсгүүдээр өөртэйгээ адил буюу хэн нэгэнтэй ижил дүр бүтээн ашиглах боломжтой апп юм. Нүүр царайны хэлбэр, хувцаслалт, арьсны өнгө, үсний засалт, бүр сэвх үрчлээ зэрэг олон төрлийн сонголтуудаас сонгон илүү бүтээлч байдлаар эможи бүтээж болно. Нарийн деталь дээр анхааран хийж болдгоороо онцлог. Хийсэн эможигоо та Snapchat-аар бусадтай хуваалцан ашиглах боломжтой. Өөрийн гар утасны тохируулга дээр bitmoji keyboard-ийг нэмж тохируулан бүрэн ашиглаарай.

Татах: IOS, Android

MEMOJI

Та энэ апп дээр өөрийн болон бусдын зургийг баяртай, гунигтай гэх зэрэг эможи хэлбэрийн 11 төрлийн сэтгэл хөдлөлөөс сонгож өөрчлөх боломжтой. Зургийг хөгжилтэй байдлаар өөрчлөн эможитой ижилхэн болгосноор та бусадтай илүү хөгжилтэй харилцаа үүсгэх юм. Энэ апп-ийг хэрэглэхдээ зураг авах өнцгөө зөв сонгох нь маш чухал. Учир нь таны царайны хэлбэрийг таньж нэмэлт зураг хэлбэр гэх мэтийг тохируулдаг тул зөв өнцөгөөс авах хэрэгтэй.

Татах: IOS

EMOJI MY FACE

Энэ аппийн онцлог нь өөрийн зургаар эможи хийж болдог. Төрөл бүрийн эффектүүд, эможиний сонголт байдаг бөгөөд та өөрийн бүтээсэн эможи ихэнх сошиал медиа дээр хэрэглэж болно. Харин зөвхөн IOS дээр байдаг апп юм.

Татах: IOS