Arslan.mn

Бас нэгэн халуун амь биднийг орхин одлоо. Бид хөвгүүдээ эр цэргийн албанд эх орноо хамгаалаарай гэж мордуулдагаас бус хэн нэгний зодуур болон халуун амиа өргө гэж илгээдэггүй билээ. 

Хэргийг дахин сануулахад энэ сарын 28-29-нд шилжих шөнө ХУД-ийн 12 дугаар хороонд байрлах Зэвсэгт хүчний 326 дугаар ангид салаан дарга, дэслэгч 25 настай Г нь согтуурсан үедээ хугацаат цэргийн албан хаагч 21 настай Б-г зодож танхайран, ноцтой гэмтэл учруулсан юм. 

Улмаар зодуулсан албан хаагч ухаангүй ТТАХНЭ-ийн эрчимт эмчилгээний тасагт хэвтэн эмчлүүлж байсан бол өнгөрсөн шөнө нас баржээ.

ТТАХНЭ-ийн мэргэжилтэн О.Хандмаагаас тодруулахад: Цэргийн алба хаагч манай эмнэлэгт энэ сарын 29-ний шөнө маш хүнд байдалтай, ухаангүй ирсэн. Манай эмнэлэгт цус харвалт, тархины ком, төвийн гаралтай амьсгал, зүрх судасны системийн хурц дутагдалтай байж энэ сарын 30-ны өдрийн 23.15 минутад нас барсан. Талийгаач эмнэлэгт ирэхдээ уруул нь сэтэрсэн байсан.  Хэл хазагдсан байдалтай ирсэн" гэжээ.

Тэрээр ар гэрээс нь торлуулахад: "Хүү минь харамсалтайгаар амиа алдлаа. хэдэн цагт өнгөрснийг нь ч анзаарах сөхөө байсангүй. Одоогоор тухайн цэргийн албанаас бидэнтэй холбогдоогүй байна" гэх мэдээллийг арай ядан ярих сөхөөтэй байв.

Харин түүнийг зодсон салаан дарга Г нь цагдан хоригдож байгаа юм.

Гэхдээ хэн нэгэн хариуцлага хүлээлээ гээд ээж аавын эрдэнэ болсон хүү нь эргээд эцэг эх, элгэн садандаа ирэхгүй шүү дээ?  Оны өмнөхөн бид бас л нэг хүүгээ энэ мэт хэргийн золиос болгон алдсан. Хүүгийн араас шаналах шаналал дуусаагүй байтал дахин нэг халуун амь... Эх орноо амиараа хамгаална гэдэг ч энэ мэт дарангуйлал, зодуурын золиос болж алтан амиа өргөнө гэсэн үг биш байлтай. Хичнээн цэрэг эр энхийн цагт ийм харамсалтай  байдлаар амиа алдаж, байж энэ асуудал дахин давтагдахгүй байх вэ. Сайдаа!!! 

Саяхан л дахин ийм зүйл гаргахгүй байхын төлөө ажиллана гэж байсан Батлан хамгаалахын сайдын сүржин үг чинь амьдрал дээр хэрэгжилгүй дахин нэг хүү амиа алдлаа. Энэ бол таны огцрох хамгийн том ШАЛТГААН. Дарга цэргээ элдэв бусаар хэлж, дарамталж, дэглэх бүрт халуун амь үрэгдсээр. Өөрөөр хэлбэл арми нь амь авсаар, сайд нар нь суудалдаа шигдсээр...

Эрчүүд цэргийн албанд эх орноо хамгаалах гэж очдог болохоос хүний ёсноос гажууд үйлдлийн золиос болох гэж очдоггүй!!!