Arslan.mn

Тулгар төр байгуулагдсаны 2030, Их Монгол Улсын 815, Ардын хувьсгалын 100 жилийн ой энэ жил тохиож байгаа ч Covid-19 цар тахлын нөхцөл байдалтай холбоотойгоор Улсын их баяр наадмыг цахим хэлбэрээр зохион байгуулах шийдвэрийг Засгийн газраас гаргасан.

Түүнчлэн долдугаар сарын 20-оос хойш халдварын тохиолдол буурсан аймаг, сумд эрсдэлийн үнэлгээ хийлгэсний үндсэн дээр наадам зохион байгуулах зөвшөөрөл олгосон юм.

Тэгвэл зарим аймгийн засаг дарга, онцгой комисс, иргэдийн төлөөлөгчдийн хурлаас энэ жил наадам тэмдэглэхгүй өнжих шийдвэрийг гаргаж, төсөв мөнгөө эрүүл мэндийн салбарт зарцуулахаар болсноо ээлж дараалан зарлалаа.

Тодруулбал, Монгол Улсын 21 аймгаас хамгийн эхэнд Өвөрхангай аймаг наадам тэмдэглэхгүй байх шийдвэрийг гаргаснаар бусад аймгууд ч дагаж зөв жишгийг тогтоож байна. Одоогийн байдлаар Дархан-Уул, Завхан, Орхон, Сэлэнгэ, Дорнод, Баянхонгор, Сүхбаатар, Хэнтий, Булган зэрэг нийт 10 аймаг наадам зохион байгуулахгүй байх шийдвэр гаргасан. Иргэд ч энэхүү шийдвэрийг нааштайгаар хүлээн авч байгаа бол Улсын наадмыг эсэргүүцэх нь их байна.  

Гэтэл Соёлын сайд Ч.Номинд иргэдийн эсэргүүцэл, эрүүл мэнд ямар ч хамаагүй бололтой. Учир нь өөрийн цахим хуудаснаа " Монголчууд бид өвөг дээдсээс уламжлагдан ирсэн соёл оюуны гайхамшигт ухамсартай ард түмэн билээ. Үүнийгээ хөгжүүлж, үр хүүхдүүддээ өвлүүлж үлдээх нь яг энэ цаг үед амьдарч байгаа Та бидний эрхэм үүрэг юм шүү. Бусдын соёлд авталгүй, өөрсдийнхөө соёлд эзэн байцгаая." гэж цахим наадам хийх агуулга бүхий пост оруулсан нь олны шүүмжлэлийг дагуулаад эхэллээ.