Arslan.mn

Хүнс, хөдөө аж ахуй, хөнгөн үйлдвэрийн сайд З.Мэндсайхан Засгийн газрын хуралдаанаас гарсан шийдвэрийг танилцууллаа. 

Гол нэрийн бараа бүтээгдэхүүний үнийг бууруулах, тээвэрлэлтийг зохион байгуулах ажлын хэсэг өнгөрсөн долоо хоногт тодорхой ажлуудыг хийлээ. Гол нэрийн бараа бүтээгдэхүүний импортын шокийн байдал үүссэн. Бараа бүтээгдэхүүнийг татан авах хил гаалийн боломжийг нэмэгдүүлэхээр шийдвэрлэсэн. Энэ хүрээнд Гашуунсухайт, Ханги боомтоор хүнс болон гол нэрийн бараа бүтээгдэхүүнийг импортлох нөхцөлийг бүрдүүлнэ. Үүнтэй холбоотойгоор тус хоёр боомтод Мэргэжлийн хяналтын байгууллагаас хүнсний лаборатори байгуулах, хүнс болон эм, эмнэлгийн хэрэгслийг авто тээврээр нэвтрүүлэх боломжийг энэ долоо хоногтоо багтаан шийдвэрлэхээр боллоо.

Улаанбаатар хотод мах худалдаалах 30-аас доошгүй цэг байгуулна

Мөн махны нийлүүлэлтийг нэмэгдүүлэх боломжийг нэмэгдүүлэхээр боллоо. Үүнтэй холбогдуулан Улаанбаатар хотын 30-аас доошгүй цэгт ил задгай болон агуулахын худалдааг бий болгохоор боллоо. Энэ жилийн өвөлжилтийн байдал хүнд байгаа учир малын махны экспортыг түр хугацаагаар хязгаарласан. Иймээс бизнес эрхлэгчиддээ хандаж хэлэхэд дээрх төвүүдээр дамжуулан махаа борлуулаарай.

 Гурил, тэжээл үйлдвэрлэгчдэд 150 тэрбум төгрөгийн зээлийг 3 хувийн хүүтэй олгоно

Эдийн засгаа сэргээх 10 их наяадын хөтөлбөрт хөдөө аж ахуйн салбарт хуваарилагдсан 500 тэрбум төгрөгөөс ашиглагдаагүй байгаа эх үүсвэр буюу 150 тэрбум төгрөгийг гурил болон тэжээл үйлдвэрлэгчдэд гурван хувийн хүүтэй хөнгөлөлттэй нөхцөлөөр олгохоор боллоо.