Arslan.mn

УИХ-ын намрын чуулганаар Л.Оюун-Эрдэнийн танхимаас зарим сайд нарыг огцруулах асуудал яригдаад удаж буй.

Тодруулбал, Зам тээвэр хөгжлийн сайд Л.Халтарыг МАН-ын Удирдах зөвлөлөөс огцруулах санал гаргасан талаар зарим эх сурвалж мэдээлжээ.

Учир нь өчигдөр Иргэний нисэхийн салбарынхан Л.Халтартай хэл амаа олохоо байгаад шууд Ерөнхий сайдад хандан хүсэлт хүргүүлсэн. Үүнд ИНЕГ-ын даргыг хурдан шуурхай мэргэжлийн хүнээр томилох, хуучин нисэх буудлыг зориулалтын дагуу ашиглах, шинэ нисэх буудлын үнэ хөлс өндөр бөгөөд үргэлж өсөн нэмэгдэж байгааг, ИНЕГ-ын дарга нарын хүнд суртал, гааль татварын нэгдсэн бодлого шийдэлгүй байгааг шүүмжилжээ.

Мөн Дархан-Улаанбаатар чиглэлийн авто замын бүтээн байгуулалтын ажил удааширсан, цаашлаад нүүрс тээврийн жолооч нарын дунд коронавирусийн халдвар гарсан тул БНХАУ хилээ хаасан нүүрс тээвэр зогссон зэрэг асуудал  хөндөгдөж буй.

Улмаар Ерөнхий сайд Л.Оюун-Эрдэнэ өнгөрсөн тавдугаар сард замын ажилтай биечлэн танилцахдаа салбарын сайд Л.Халтарт  "Хугацаа явах тусам зардал, хүн хүчний шаардлага нэмэгдэнэ, чанарын асуудал үүснэ. Олон нийт ч энэ замын асуудалд бухимдалтай байна. Долоо хоног бүрийн Засгийн газрын хурлаар явцыг танилцуулж байгаарай. 2022 оны 7-р сард Гашуунсухайтын төмөр зам ашиглалтад орно. Түүний дараа Дарханы зам 10-р сард ашиглалтад орох нь байна. Тохирлоо шүү. Та толгойгоороо хариуцна шүү" гэж байв.

Гэсэн ч замын бүтээн байгуулалтын ажлыг 2022 онд дуусгаж амжихгүй, удаашралтай байгааг салбарынхан мэдэгдэж байна.

Ийнхүү Л.Халтар сайдын салбар бүр шаардлага, хүсэлт шахалтаар дүүрч бослого хөдөлгөөн хаа сайгүй гарч байна.