Arslan.mn

Төрийн ордонд Нийгмийн бодлогын байнгын хороо “Халамжаас хөдөлмөрт” хэлэлцүүлгийг өнөөдөр /2022.09.26/ зохион байгуулж байна.

Эл хэлэлцүүлгийн үеэр ХНХ-ын сайд Д.Сарангэрэл "Ядуурлын түвшнээс доогуур орлоготой 1,520 өрхийг ядуурлаас гаргах зорилт тавьсан. Хөтөлбөр хэрэгжүүлнэ. Амжиргааны түвшин доогуур буюу ядуу өрхүүдээс хөдөлмөрийн насны 18-55 насны иргэдийг сонгож үсчний мэргэжил эзэмшүүлэх хоёр сарын сургалтад суулгана. Ингээд суралцсаных нь дараа тэр хүнд хэрэгтэй сэнс, сам, хими хийх бодис, будаг, материалыг нь авч өгнө. Энэ ажлыг арваннэгдүгээр сараас эхлүүлнэ.Амжилттай болбол Монгол Улс ядуурлаас хэрхэн гарах загвараа бий болно. 

Мөн орон нутагт ажлын байр бий болгоход чиглэсэн санхүүжилтийг Хөдөлмөр эрхлэлтийг дэмжих сангаас олгоно.  Тооцоо судалгааг бодитой болгож байж, сангаас санхүүжилтээ авна. Үр дүнгийн гэрээ байгуулна.

Ядуурал, ажилгүйдэлд цар тахлын нөлөө их байна. 2020 онд ажил хийх боломжтой боловч ажил хийхгүй байгаа 207.800 хүн байгаа талаар судалгаанд дурдсан. Эдгээр хүний:

• 87.7 мянга нь ажилгүй хүн
• 70.7 мянга нь боломжит ажиллах хүч
• 49.4 мянга нь ажил хийх хүсэлтэй байгаа ч ажил хайгаагүй хүн байна.

2021 онд нийт ААН-ийн 19.1 хувь нь ажиллах хүчний хомстолд орсон. Өөрөөр хэлбэл 40 мянган ажлын сул байранд ажиллах хүч олдоогүй байна." хэмээн ярилаа.