Arslan.mn

Сүүлийн өдрүүдэд нүүрсний хулгайн асуудал босож, иргэд нүүрсний хулгайтай холбогдсон хүмүүст хариуцлага тооцохыг шаардаж 7 дахь өдрөө төв талбай дээр жагсаж байгаа билээ. 

Жагсагчдын шаардлагыг Засгийн газар хүлээн авч, эхнээсээ ажил болгож байгаагаа зарлаж эхлээд байгаа билээ. Гэтэл УИХ-ын гишүүн, Засгийн газрын гишүүн, ЗТХ-ийн сайд С.Бямбацогт нь олон жил нүүрсний бизнес эрхэлж, толгой томчуудын тэргүүн эгнээнд явж байна. Түүний хамаарал бүхий компани Ховдын "Хөшөөт"-ийн уурхайгаас Хятад руу өчнөөн автомашинаар нүүрс тээвэрлэж байна. Мөн аалзны тор шиг сүлжээ үүсгэн олон компаниар нүүрс гаргаж байгаа талаар бид тоймлон хүргэж байна. 

Тодруулбал, ЗТХ-ийн сайд С.Бямбацогтын "Нью прогресс групп" ХХК-ийн харьяа "Алтайн зам" компани нь Ховд аймгийн Дарви сумын нутагт байрлах "Хөшөөт"-ийн нүүрсний уурхайн хөрс хуулалт, баяжуулалтын ажлыг гүйцэтгэдэг. 

С.Бямбацогтын төрсөн дүү С.Баянмөнх нь "Алтайн зам" ХХК-ийн гүйцэтгэх захирал Б.Энхбаттай хамтран "Алтай строй" ХХК-ийн хамтран эзэмшиж байна. Харин "Алтайн строй" ХХК нь Ховдын "Хөшөөт"-ийн нүүрсний уурхайгаас Хятадын Такашикен боомт руу 28 автомашинаар нүүрс тээвэрлээд олон жил болж байна. 

Түүнээс гадна "Алтайн строй" ХХК -ийн гүйцэтгэх захиралаар ажиллаж буй Б.Мянганбуу нь хувьдаа "Цаст Алтайн жинчид" ХХК-ийг эзэмшиж мөн л Хятад руу 47 автомашинаар нүүрс тээврлэж байна. 

Мөн С.Бямбацогт сайдын хамаарал бүхий компаниуд Өмнөговь аймгийн Ханбогд, Баян-Овоо сумдад шатахуун түгээх станц байгуулжээ. 

Бидэнд мэдэгдэж байгаа нь дээрх 4,5 компаниар нүүрс тээвэрлэн гаргаж байна. 

Л.Оюун-Эрдэнэ сайд аа, засаг чинь нүүрсний хулгайтай тэмцэж байхад Засгийн газрын гишүүн нь нүүрсний тээвэр эрхэлж, мафийн бүлэглэлийн нэг нь болчихсон байна. 

Ерөнхий сайд аа, С.Бямбацогт сайддаа хариуцлага тооцож, хууль хяналтын байгууллагаар нээлттэй шалгахыг шаардаж байна. эсвэл УИХ-ын гишүүний бүрэн эрхээс нь түдгэлзүүлж шалгуулахыг шаардаж байна.