Arslan.mn

Өнөөдөр Байгаль орчин, уур амьсгалын сан, Шинжлэх ухаан, технологийн сан, Гэмт хэргийн хохирогчид нөхөн төлбөр олгох сан, Кино урлагийг дэмжих сан болон Хилийн чанадад байгаа монгол иргэдэд туслах сангийн мэдээллийг нээлттэй болголоо.

Шилэн ажиллагааны хүрээнд Хилийн чанадад байгаа Монгол Улсын иргэдэд туслах сангийн мэдээлэл shilen.gov.mn системд байршиж, одоогийн байдлаар 179 мэдээлэл бүртгэгджээ. Тус сан 2009 оноос хойш нийтдээ 3 тэрбум 125 сая төгрөгийг тусламж хэлбэрээр олгожээ.

Тухайлбал, олон улсын шилжилт хөдөлгөөний байгууллагын зардлаар Монголд ирсэн 98 иргэний тусгаарлах байрны зардал, мөн Турк, АНУ, БНСУ, ОХУ, ИБУИНХУ-аас ирсэн 18 иргэний замын зардал болон тусгаарлах байрны зардалд 2020 онд Гадаад харилцааны сайдын тушаалаар 216 сая төгрөгийг олгожээ.

Мөн Ковид-19-ын улмаас Турк улсад төлбөрийн чадваргүй болсон 198 иргэнд хүнсний багц, Хятадаас буцсан 74 иргэний визийн торгуульд нийт 132 сая төгрөгийг олгосон байна.

2009-2023 оны хооронд олгосон дүнг харвал 2020 онд хамгийн их буюу 733,896,000 төгрөгийн тусламжийг олгосон аж.