Arslan.mn

Ерөнхий сайд Л.Оюун-Эрдэнэ, Монголбанкны Ерөнхийлөгч Б.Лхагвасүрэн, Сангийн сайд Б.Жавхлан нар Монгол Улсад чуулахаар ирсэн дэлхийн томоохон банк, санхүүгийн байгууллагын удирдлагуудтай өглөөний уулзалт хийж, Монгол Улсад салбар, нэгжээ байгуулан ажиллахыг урьжээ.

"Монголын эдийн засгийн чуулган 2023" чуулга уулзалтад гадаадын томоохон банк, санхүүгийн байгууллагын 50 орчим зочид төлөөлөгч оролцож байгаа юм. Тухайлбал, өглөөний уулзалтад Deutsche Bank, UBS, JPMorgan Cazenove, Goldman Sachs, Sumitomo Mitsui, Barclays, Bank of China, Morgan Stanley, US EXIM, Citi, BNP Paribas Exane, HSBC Australia Bank, Standard Chartered, ING, Lazard Asset mgt, Export finance Australia, MIGA, Cliffort capital, Bank of America, RBC, Barrenjoey Capital Partners, Natixis HK, GIC, Ubique Asset mgt, EBRD, IFC, KFW, Canadian Imperial Bank of Commerce зэрэг олон улсын нөлөө бүхий байгууллагын төлөөлөл оролцжээ.

Тус хөрөнгө оруулагчдад өнгөрсөн жил баталсан Гадаадын хөрөнгө оруулалтын банкны тухай хуулийг танилцуулж, Монгол Улсад хөрөнгө оруулах бусад боломжийн талаар санал солилцсон байна.

Ерөнхий сайд Л.Оюун-Эрдэнэ: Манай улс саяхан Үндсэн хуульдаа нэмэлт, өөрчлөлт оруулан УИХ-ын гишүүдийн тоог 126 болгож, нэмэгдүүллээ. Энэ бол хөрөнгө оруулагчдад чиглэсэн бодлогын тогтвортой байдлыг хангах бидний хамгийн том амжилтуудын нэг юм. Сонгуулийн холимог тогтолцоо нийгмийн төлөөллүүд хууль тогтоох байгууллагад орж ирэх үүд хаалгыг нээж, жендэрийн тэгш байдлыг хангаж, бусад намуудад томоохон боломж олгох болно. Илүү ил тод, бизнест ээлтэй орчин бүрдүүлэхийн тулд Монгол Улсын Засгийн газар авлигатай тэмцэж, дижитал шилжилтийг эрчимжүүлж байна.