Arslan.mn

Спортын сайд Б.Бат-Эрдэнэ тамирчнаас нь допинг илэрсэн боксын холбооны санхүүжилтыг зогсооно гэж мэдэгдсэн. Харин  боксын холбооноос дээрх мэдэгдлийг хэт улс төржсөн гэж тодотгон арбитрын ажиллагаанд сөргөөр нөлөөлж болохуйц үйлдэл гэжээ.

Тодруулбал, "ХАНЖОУ-2022" Азийн наадмаас алтан медаль хүртсэн ч допинг илэрсэн нь тогтоогдсон ДАШТ-ий мөнгөн медальт, Ази тивийн аварга, гавьяат тамирчин Б.Чинзоригийг Боксын холбоо шигшээ багаас хөөх шийдвэр гаргаж, дасгалжуулагч нартаа арга хэмжээ авсан байна. Тухайлбал, боксын шигшээ багийн ахлах дасгалжуулагч Ж.Энхтөрийг гурван сарын хугацаанд цалингийн 20 хувиар торгох, туслах дасгалжуулагч Ц.Даваацэрэн, Д.Эрдэнэбаяр нарт нээлттэй сахилгын хариуцлага тооцохоор болжээ.

Харин гавьяат тамирчин Б.Чинзориг допинг илэрснээ хүлээн зөвшөөрөхгүй гэдгээ мэдэгдэж, Олон улсын спортын арбитрт хандсан байна.