ЖДҮГ-ын дарга Я.Эрдэнэсайхан төсвийн 2,1 тэрбум төгрөгийг “Шинэ хоршоо хөдөлгөөн“-ийг сурталчлах нэрийдлээр зарцуулжээ
Жижиг, дунд үйлдвэрийн газрын дарга Я.Эрдэнэсайхан энэ онд зөвхөн Засгийн газрын "Шинэ хоршоо хөдөлгөөн"-ийг олон нийтэд сурталчлах нэрийдлээр төсвийн 2.1 тэрбум төгрөгийг зарцуулжээ.
Тухайлбал, Шилэн дансанд байршуулсан мэдээллээр энэ оны тав, зургаадугаар сард төсвийн нийт 2,144,200,000 төгрөгөөр Шинэ хоршоо хөдөлгөөний талаар мэдээллийг цаг алдалгүй олон нийтэд хүргэх буюу сурталчилгааны ажлыг хийх нэрийдлээр зарцуулжээ.
Өөрөөр хэлбэл өнгөрсөн УИХ-ын ээлжит сонгуулийн үеэр ийнхүү зарцуулсан гэсэн үг.
Тухайлбал, зургаадугаар сард гэхэд телевиз, сайтуудтай цуврал реклам түгээхэд нэг тэрбум орчим төгрөгийг зарцуулсан байжээ.
Хамгийн ноцтой нь, төсвийн буюу татвар төлөгчийн энэ их мөнгийг тендэр зарлахгүйгээр цаг үеийн мэдээлэл түгээх нэрийдлээр хэвлэл мэдээллийн үйлчилгээг шууд гэрээ байгуулах аргыг ашиглан ЗГХЭГ-аас санал болгосон аж ахуйн нэгжүүдтэй байгуулсан аж.
ЖДҮГ-ын Я.Эрдэнэсайхан даргад төрийн мөнгө гэж байдаггүй, зөвхөн татвар төлөгчдийн мөнгө гэж байдгийг “сануулъя"...