Arslan.mn

Улаанбаатар /МОНЦАМЭ/. Энэ сарын 5-ны өдөр Москва хотын “Хүндэтгэлийн дэнж”-д Монголын ард түмнээс Оросын ард түмэнд бэлэг болгосон “Дайны замаар” хөшөөний нээлт боллоо.

2015 онд Дэлхийн II дайны ялалтын 70 жилийн ойг тэмдэглэх хүрээнд Монгол Улсын Ерөнхийлөгч Ц.Элбэгдорж “Монголын ард түмнээс Оросын ард түмэнд” хэмээн уран барималч А.Очирболдын “Дайны замаар” нэртэй урагш тэмүүлж буй морьдын хөшөөг бэлэглэснийг ОХУ-ын Ерөнхийлөгч В.В.Путин ихэд бэлгэшээж хүлээн авсан билээ. Харамсалтай нь хөшөөг байрлуулах газар тодорхойгүй байснаас Москва дахь ЭСЯ-ны хашаанд хадгалагдаж байсан юм.

Тэгвэл Москва дахь Монгол Улсын ЭСЯ-аас томилогдсон ажлын хэсэг Москва хотын захиргаа, Уран сайхны зөвлөл зэрэг 43 байгууллагаас албан ёсны зөвшөөрөл авсны үр дүнд ийнхүү Москва хотын “Хүндэтгэлийн дэнж”-д хөшөө сүндэрлэлээ.

Хөшөөний нээлтэд Монгол Улсаас ОХУ-д суугаа Онц бөгөөд Бүрэн Эрхт Элчин сайд Б.Дэлгэрмаа, Монгол Улсын Гадаад Харилцааны Яамны Сайд Ц.Мөнх-Оргил, ОХУ-ын “Шударга Орос” намын дарга С.Миронов зэрэг хүндэт зочид оролцов.

“Аугаа Эх Орны дайны үед Улаан армийн таван морь тутмын нэг нь монгол адуу байсан юм. Монгол адуу жижиг боловч их тэсвэр тэвчээртэй, хүчтэй. Фашизмтай тэмцэхэд их хувь нэмэр оруулсан Монголын ард түмэнд бид үргэлж талархаж явах болно” хэмээн ОХУ-ын “Шударга Орос” намын дарга С.Миронов “Дайны замаар” хөшөөний нээлтийн үеэр онцлов.

Дашрамд дурдахад Дэлхийн II дайнд Монгол Улс хамгийн эхний өдрөөс эхлэн Оросын ард түмэнд морины сайныг шилж хагас сая адууг фашизмтай тэмцэх үйлст хандивлан, дайны хүнд хүчир таван жилийг Оросын ард түмэнтэй хамт туулсан түүхтэй билээ.