Arslan.mn

АТГ-аас Тавантолгойн ордыг ашиглах Хөрөнгө оруулалтын гэрээг боловсруулах явцад бусдад хууль бус давуу байдал олгосон байж болзошгүй хэргийг шалгаж эхэлсэн бөгөөд уг ажлын хэсгийн ахлагчаар ажиллаж байсан М.Энхсайханд эрүүгийн хэрэг үүсгэн, сэжигтнээр тооцоод байсан. Гэтэл шүүхээс Авлигатай тэмцэх газрын Мөрдөн шалгах хэлтсээс шүүхийн зөвшөөрөлгүй баривчилсан нь Үндсэн хууль болон Эрүүгийн хэрэг хянан шийдвэрлэх тухай хуулийг зөрчсөн гэж үзэн мөрдөгчийн тогтоолыг хүчингүй болгож М.Энхсайханыг Урьдчилан хорих 461 дүгээр ангиас суллах болсон билээ.

Тэгвэл одоо Монгол Улсын Ерөнхийлөгч асан Ц.Элбэгдоржийг ч уг хэрэгт холбогдуулан шалгаж буй бөгөөд түүнийг Монголд ирмэгц сэжигтнээр тооцон, мэдүүлэг авч эхлэх тухай эх сурвалж мэдээллээ.
Тодруулбал, Монгол Улсын Ерөнхийлөгч Х.Баттулга энэ оны 1-р сарын 16-нд Прокурорын байгууллагын удирдах ажилтны нэгдсэн зөвлөгөөнд оролцож үг хэлэх үеэр ""Би Ерөнхийлөгч биш Халтмаагийн Баттулга гэдэг иргэнийхээ хувиар хандаж байна. Ард түмний өмч Тавантолгойг гэрээгээр халхавчлан гадныханд 100 жилээр хууль бусаар өгөх гэж байхад 2015 онд УИХ- ын нэр бүхий 40 гишүүн авч үлдсэн юм. Энэ хуйвалдааныг төрийн өндөр албан тушаалтан Цахиагийн Элбэгдорж гардан гүйцэтгэх ажлыг зохион байгуулсан. Үүнийг яагаад одоо болтол шалгахгүй байна вэ. Иргэн Х.Баттулгын хувьд 178 хуудас баримтыг гардуулж байна. Энэ хэргийг шалгуулья" гэсэн билээ.