Arslan.mn

Энэ сарын 05-ны өдөр БНХАУ-ын Гадаад хэргийн сайд Ван И манай улсад айлчилна. Тэрбээр энэ удаагийн айчлалаараа Эрдэнэбүрэнгийн усан цахилгаан станц, Багануурын цахилгаан станцын асуудлыг эцэслэн шийдвэрлэх, хилийн боомтуудтай холбоотойгоор Бээжингийн өвлийн олимпийн үеэр Ерөнхий сайд Л.Оюун-Эрдэнэтэй хийсэн яриа хэлэлцээнд гарын үсэг зурах  зэрэг асуудлыг шийдвэрлэх юм байна. Айлчлалын үр дүнд хоёр улсын хамтын ажиллагаанд хэд хэдэн нааштай үр дүн гарна хэмээн шинжээчид харж байгаа аж. 

Эрдэнэбүрэнгийн усан цахилгаан станцын бүтээн байгуулалтын ажлыг энэ намар эхлүүлж чадвал таван жилийн дараа бүрэн ашиглалтад оруулах аж. Ингэснээр баруун бүсийн эрчим хүчний эх үүсвэр найдвартай болох юм.

Түүнчлэн Ханги, Шивээхүрэн боомтуудын нэвтрүүлэлтийг сайжруулах, хоёр талын ачаа тээвэр саадгүй явах нөхцөлийг бүрдүүлэх аж. Түүнчлэн, Ван И сайдын айлчлалаар Хятадын Ардын банк, Монголбанктай байгуулсан 15 тэрбум юанийн /1.8 тэрбум ам.доллар/ своп хэлцлийн хугацааг 2026 хүртэл дахин сунгах асуудлаар шийдвэр гарах хүлээлт бий. Бээжингийн өвлийн олимпын үеэр манай талаас своп хэлцлийн хугацааг дахин гурван жилээр сунгах хүсэлтэй байгаагаа айлын талд илэрхийлсэн ч эцсийн шийдвэр гараагүй байгаа юм. 

БНХАУ-ын Гадаад хэргийн сайд Ван И манай улстай харилцаагаа бэхжүүлэхээр 2020 онд Монголд айлчилсан билээ. Монгол Улсын Гадаад харилцааны сайд Н.Энхтайван, БНХАУ-ын Төрийн зөвлөлийн гишүүн, Гадаад хэргийн сайд Ван И нар 2020 оны есдүгээр сарын 15-ны өдөр албан ёсны хэлэлцээ хийсэн.

Хэлэлцээний үеэр Гадаад харилцааны сайд нар Монгол, Хятадын Иж бүрэн стратегийн түншлэлийн харилцааг бэхжүүлэх, харилцан ойлголцол, улс төрийн итгэлцлийг гүнзгийрүүлэх, бүх салбарын хамтын ажиллагааг урагшлуулах болон бүс нутаг, олон улсын харилцааны холбогдолтой өргөн хүрээний асуудлаар ярилцаж, олон асуудлаар тохиролцоонд хүрсэн билээ.