Arslan.mn

"Эрдэнэт” үйлдвэрийн 49 хувийн хувьчлал, “Хөтөл цемент шохой" үйлдвэр, Дарханы төмөрлөгийн үйлдвэрийн концессын гэрээ зэрэгтэй холбоотой хэргийн шүүх хурлын урьдчилсан хэлэлцүүлэг Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхэд өнөөдөр болж байна.

Тодруулбал, уг хэрэгт Д.Эрдэнэбат, Д.Доржханд, Б.Минжбадам, Д.Ганбат, Л.Санжаадорж, Б.Болор, Г.Ганзориг, Д.Батжавхлан, Р.Мөнхтуул, Б.Мөнхсоёл, Д.Эрэвгийлхам, Д.Сугар, Д.Энхтунгалаг, О.Орхон, Н.Батбаяр, Ц.Пүрэвтүвшин, Ч.Энхболд, Ц.Нанзаддорж, Э.Шижир, С.Уранчимэг нарын 20 хүн, Төмөр замын зураг төслийн институт ХХК, Кью Эс Си ХХК нарын 2 хуулийн этгээдэд холбогдуулан яллах дүгнэлт үйлдэж ирүүлсэн.

Энэ үеэр яллагдагч, УИХ-ын гишүүн асан Н.Батбаяр "Шүүхийн урьдчилсан хэлэлцүүлэг боллоо. Оролцогчдоос хүсэлт гаргасан, тиймээс шүүх хурал хойшиллоо. Энэ хэрэгт би яллагдагчаар татагдсан. Намайг Дарханы Төмөрлөгийн үйлдвэрийг байгуулах концессын гэрээнд Засгийн газрын тогтоолыг гаргасан гэх үндэслэлээр буруутгаж байгаа. Энд хууль зөрчсөн гэм буруутай үйлдэл байхгүй.  Монгол Улсад Төмөрлөгийн үйлдвэр хэрэгтэй юу гэвэл хэрэгтэй. Надад гэм буруу байхгүй. Энэ хэрэг "Эрдэнэт"-ийн 49 хувь гэдэг малгайтай орж ирж байгаа. Би хэрэгт ямар ч холбоогүй. Шүүхийг аль болох хурдан хуралдаж, асуудлаа шийдэх нь зүйтэй гэж үзэж байна" гэв.