Arslan.mn

Нийслэлийн төвд байрлах төр, нийгмийн зүтгэлтэн Санжаасүрэнгийн Зоригийн хөшөөг зарж, газар дээр нь олон давхар барилга барихаар болжээ.

Тодруулбал, нийслэлийн Засаг дарга бөгөөд Улаанбаатар хотын захирагч Х.Нямбаатар өөрийн цахим хуудастаа, “Бид Зоригтойгоо үлдэнэ” хэмээн нэгэн нийтлэлийг оруулсан байна. Уг нийтлэлд Монголын ардчилсан холбоо С.Зориг агсны хөшөөг нүүлгэн шилжүүлж, барилга барих болсон талаар өгүүлжээ.

Энэ талаар тэрбээр "Зоригийн хөшөөг заржээ! Зараад зогсохгүй хөшөөг нүүлгэн шилжүүлж газар дээр нь цамхаг барихыг санаархаж байна. Үр могой эхийгээ залгидаг шиг МоАХ-оос улбаатай энэ байгууллага их л эелдэгээр "Зориг сан"-д хөшөөг нүүлгэн шилжүүлж өгнө үү гэжээ. Лав л Монгол хүний дотор хэзээ ч ийм атгаг шуналын сэдэл төрөхгүй. Монголын түүхэнд хар толбо болж үлдсэн цуст хэрэгт гэмгүй иргэдийг хэлмэгдүүлэн яллаж, ахуйн гэмт хэрэг болсон мэт ойлголт өгөхийг одоо болтол хичээсээр байгаа нь ойлгомжтой болсоор байна. Монголыг хайрладаггүй нүгэлт хар гөрөөчний бүхэл бүтэн тролл арми байгааг өнөөдөр харлаа. Монголын ардчиллыг эднээс хамгаалах хэрэгтэй болжээ гэдгийг ч бас харлаа. Бид "Зоригтой"-гоо үлдэнэ" гэжээ.

Сүхбаатар дүүргийн 1 дүгээр хорооны нутаг дэвсгэрт байрлах С.Зоригийн хөшөөтэй АН-ын төв байр болоод газрыг "Шинэ дэвшилт холбоо" ТТБ эзэмшдэг байжээ. Тус холбоог АН-ын Да.Ганболд эзэмшлийнх  бөгөөд энэхүү газраа  “Голомт”-ын Д.Баясгалангийн “Ардчиллын өргөө” ХХК-нд 480 мянган ам.доллароор худалдсан гэдэг мэдээлэл гараад удаж байсан.

Тэгвэл Д.Баясгалан тухайн газарт 25 давхар бүхий оффис, үйлчилгээний барилга барихаар 2014 онд Архитектур төлөвлөлтийн даалгавраа гаргуулан авсан байжээ.

Энэ талаар Ардчилсан намын дарга асан С.Эрдэнэ өмнө нь "Ардчиллын өргөө барина гээд Н.Алтанхуяг намын дарга байх үедээ тэр байрыг зарж үрээд алга болсон. Одоо хууль шүүхийн байгууллагаас шалгаж байгаа. Шинэ дэвшил холбооны намын байр буюу бидний нэрлэдгээр “Муурын байшин” түүх соёлын дурсгалтай байр. Намайг 2017 онд намын дарга болоход “Голомт”-ын Д.Баясгалан уулзаж, “Энэ байрыг худалдаж авсан. Монголын үндэсний дэвшил нам болон Шинэ дэвшил холбооныхонтой яриад, газрыг худалдаж авсан. Хотын захиргаанаас бүх бичиг баримт нь миний нэр дээр гарсан. Энэ газар дээр 41 давхар үйлчилгээний зориулалттай барилга босгох гэж байна” гэж хэлсэн." гэж ярилцлага өгч байв.