Arslan.mn

УИХ-ын чуулганы хуралдаанаар Үндсэн хуулийн Цэцийн дүгнэлтийг хүлээж авсан УИХ-ын тогтоолд тавьсан Ерөнхийлөгчийн хоригийг хэлэлцлээ.

Энэ үеэр УИХ-ын гишүүн Т.Аюурсайхан "ҮХЦ-тэй хуйвалдсан гэсэн яриаг хүлээн зөвшөөрөхгүй. Үндсэн хуульд цагаан дээр хараар зөвхөн нэг удаа зургаан жилээр сонгогдоно гэж заасан. Нэг удаа улируулан сонгоно гэсэн заалтыг хассан. Цэц дээр үүнийг өөрөөр тайлбарлуулах гэж нөлөө үзүүлсэн. Энэ Үндсэн хуулийн өөрчлөлтийг Ерөнхийлөгч өөрөө ард түмний өмнө батламжилсан.

Ерөнхийлөгч Х.Баттулгад дахин нэр дэвших боломж олгоё гээд Ерөнхийлөгчтэй холбоотой заалтыг 2025 оны долдугаар сарын 1-нээс хэрэгжүүлье гэж оруулж ирсэн. Гэтэл ЕТГ-ын дарга З.Энхболд нэн даруй хэрэгжүүлье гэдэг санал тавиад, үүнийг нь Ерөнхийлөгч өөрөө зөвшөөрч батламжилсан.

Одоо өөр юм яриад, ард түмнийг талцуулах хэрэггүй. УИХ-ын томилгооны шийдвэрт Ерөнхийлөгч хориг тавьж болдог юм уу. Ерөнхийлөгч цөөнхтэй нийлээд УИХ-ын олонхын эрхэд халдах жишиг тогтоож байна. Өмнө нь ийм жишиг байгаагүй." гэв.