Arslan.mn

Ерөнхий сайд Л.Оюун-Эрдэнийн ээлжит “дайсан”-аар УИХ-ын дэд дарга С.Одонтуяа нөхөр Г.Өлзийбүрэн нар тодорлоо.

“...Тэд вакцинжуулалтыг улстөржүүлсэн” гэж Ерөнхий сайд Л.Оюун-Эрдэнэ мэдэгдэв.

Тэрбээр 2021 оны тавдугаар сарын 10-нд Засгийн газрынхаа 100 хоногийн хэвлэлийн бага хурал дээр “...Вакцинжуулалттай холбоотой асуудлыг улстөржүүлсэн олон асуудал байсан. Асуудлыг хурцатгаад яахав гэж бодож би тухайн үед дуугүй л явсан. Энэ дээр онцгой үүрэг гүйцэтгэсэн хүн бол УИХ-ын дэд дарга С.Одонтуяа, түүний гэр бүлийн хүн Г.Өлзийбүрэн байсан. Мөн гаалийн байцаагч руу утасдаж, дарамталсан асуудал гарсан. Төрийн өндөр дээд албан тушаалтан эрх мэдлээ урвуулан ашиглаж болохгүй гэдэг хатуу байр сууринаас өнөөдөр хэлчих нь зүйтэй байх. Би энэ асуудлыг хууль хяналтын байгууллагад өгч шалгуулна гэж бодож байгаа. УИХ-ын дэд дарга хүн гаалийн байцаагч руу утасдаж, гаалиар ийм бараа орж ирэх, ирэхгүйг шийддэг. Эсвэл хэн нэгэн хүн хууль хяналтын байгууллагатай холбогдож, Засгийн газрын үйл ажиллагааг гуйвуулах нь ёс зүйд нийцэхгүй” гэсэн юм.

Энэ мэдээлэл цацагдсаны дараа УИХ-ын дэд дарга С.Одонтуяа цахим хуудсаараа дамжуулан “...Дөнгөж сая Ерөнхий сайд Л.Оюун-Эрдэнэ Засгийн газрын 100 хоногт хийж, хэрэгжүүлсэн ажлын талаар мэдээлэл хийхдээ сэтгүүлчдэд тун хариуцлагагүй мэдэгдэл хийлээ. Тэрбээр вакцины татан авалтыг гацаасан хүн бол УИХ-ын гишүүн С.Одонтуяа гэж намайг хэлсэн. Мөн манай нөхрийг дурдсан. Манай нөхөр төрийн дээд албан тушаал хашдаг хүн биш. Миний хувьд энэ вакцины асуудалд нөлөөлөх боломжгүй. Энэ бол цэвэр Засгийн газрын ажил. Би вакцины талаар чуулган дээр төсөв батлахаас нь эхлээд вакциныхаа мөнгийг төсөвт суулгаач ээ. Ингэвэл найдвартай шүү. Хурдан ирдэг юм шүү гэдгийг маш олон удаа хэлсэн. Дээрээс нь иргэдийг вакциныг сонголттой хийлгээч ээ гэдэг зүйлийг хэлсэн. Шүүмжилсний төлөө намайг үндэслэлгүй гүтгэж байна. Би хуулийн байгууллагад хандаж шалгуулна. Засгийн газрын хариуцлагыг хувь хүн, сөрөг хүчин рүү чихэж байгаад харамсч байна” гэж мэдэгдэл хийсэн юм.

Улмаар 2021 оны тавдугаар сарын 21-нд хэвлэлийн бага хурал зарлаж “Би Хан-Уул дүүргийн Иргэний шүүхэд гомдол гаргасан. Нэр төрөө сэргээлгэнэ. Шүүхээр хэнийг ч гэм буруутай гэдгийг нь эцэслээгүй байхад Ерөнхий сайдын амнаас сөрөг хүчнийхээ, тэр дундаа УИХ-ын дэд дарга хүний нэр хүндэд халдах нь байж боломгүй явдал.  Тиймээс би нэр төр, алдар хүндээ сэргээлгэх, хариуцагчийг уучлал гуйх, мэдээлэл тараасан арга хэлбэрээрээ залруулга хийхийг шаардсан. Мөн Ерөнхий сайдаас 100 сая төгрөг нэхэмжилсэн. Энэ мөнгийг цар тахлын үеэр орон гэргүй болсон өрх толгойлсон ээжүүдэд өгнө” гэв.

Тэгвэл Ерөнхий сайд Л.Оюун-Эрдэнэ дуугүй суугаагүй байна. С.Одонтуяа, түүний нөхөр Г.Өлзийбүрэн нартай холбоотой долоон асуудлыг шалгуулахаар АТГ зэрэг хуулийн байгууллагуудад ханджээ. Баттай эх сурвалжийн мэдээллээр дараах асуудлуудыг шалгуулах хүсэлтийг гаргажээ.

№1: ХУУЛЬ БУСААР ВАКЦИНЫ БИЗНЕС ХИЙХИЙГ ОРОЛДСОН ГЭХ...

УИХ-ын дэд дарга С.Одонтуяа, түүний нөхөр Г.Өлзийбүрэн нар нь цар тахлын эсрэг вакциныг хууль бусаар оруулж ирэх, худалдаалах зорилгоор аливаа хуулийн этгээд, иргэн С нарын хувь хүмүүстэй яриа хэлэлцээр хийсэн эсэх болон УИХ-ын дэд дарга С.Одонтуяа вакцинтай холбоотойгоор байр суурь илэрхийлж байсан талаар шалгуулах.

№2: ӨМГӨӨЛӨГЧ Б.БААСАНЦОГТООР ДАМЖУУЛЖ ШҮҮГЧ НАРТ АВЛИГА ӨГСӨН ГЭХ...

УИХ-ын дэд дарга С.Одонтуяа, түүний нөхөр Г.Өлзийбүрэн нар нь өмгөөлөгч Б.Баасанцогттой хамтарч, түүгээр дамжуулж “Ариг” банк болон “Улаанбаатар импекс” компанид давуу байдал олгож, Хан-Уул дүүргийн Иргэний хэргийн шүүхийн Э, М нарын шүүгч нар, тэдний ойрын хамаарал бүхий хүмүүст авлига, хээл хахууль өгсөн эсэх талаар шалгуулах.

№3: ГААЛИЙН БАЙЦААГЧ НАРТ НӨЛӨӨЛЖ ХУУЛЬ БУСААР ТАТВАРГҮЙ БАРАА ОРУУЛЖ ИРСЭН ГЭХ...

УИХ-ын дэд дарга С.Одонтуяа, түүний нөхөр Г.Өлзийбүрэн нар нь Улаанбаатар хот дахь Гаалийн газрын байцаагч нарт нөлөөлж, А хоршооны гаалийн зөрчил бүхий 801 хайрцаг барааг улсын хилээр татваргүй болон хуурамч материал бүрдүүлж оруулж ирсэн талаар шалгуулах.

№4: ГАЗРЫН ТОСНЫ БҮТЭЭГДЭХҮҮН ХУВААХ ГЭРЭЭТЭЙ ХОЛБООТОЙГООР ЛИЦЕНЗИЙГ ХУУЛЬ БУСААР ЭЗЭМШСЭН ГЭХ...

УИХ-ын дэд дарга С.Одонтуяа, түүний нөхөр Г.Өлзийбүрэн нар нь Дорнод аймгийн нутаг дэвсгэрт байдаг МВ компанийн Х нэртэй газрын тосны  лиценз дээр бүтээгдэхүүн хуваах гэрээтэй холбоотойгоор албан тушаалын болоод улс төрд нөлөө бүхий байдлаараа өөрсөддөө давуу байдал олгож уг газрын тосны талбай болон бусад ашигт малтмалын лицензийг хууль бусаар эзэмшилдээ авсан эсэхийг шалгуулах.

№5: “ОЮУТОЛГОЙ”, “ЭРДЭНЭС МОНГОЛ”, “ЭРДЭНЭС ОЮУТОЛГОЙ” КОМПАНИУД БОЛОН ТӨҮГ-УУДЫН ХУДАЛДАН АВАЛТАД НЬ НӨЛӨӨЛЖ БАРАА МАТЕРИАЛ “ШАХДАГ” ГЭХ...

УИХ-ын дэд дарга С.Одонтуяа, түүний нөхөр Г.Өлзийбүрэн нар нь албан тушаалын болоод улс төрийн нөлөө бүхий байдлаа ашиглаж, “Оюутолгой”, “Эрдэнэс Монгол”, “Эрдэнэс Оюутолгой” компаниуд болон ТӨҮГ-уудын худалдан авалтад нь нөлөөлж бараа материал “шахах” зэргээр оролцсон, мөн тэдгээр компани, удирдлагуудаас нь төрсөн хүү Үнэнбүрэнгийнхээ болон өөрийнхөө дансаар хувьдаа мөнгө авсан болон бусад асуудлыг шалгуулах.

№6: ДҮҮРГҮҮДИЙН ТЕНДЕРҮҮДИЙГ ХАМААРАЛ БҮХИЙ ЭТГЭЭДҮҮДДЭЭ АВЧ ӨГСӨН ГЭХ...

УИХ-ын дэд дарга С.Одонтуяа нь Баянгол дүүргийн Засаг даргаар ажиллаж байхдаа хадам ээж Ц гэх мэтийн өөрийн ойр дотнын, хамаарал бүхий этгээдүүдэд дүүргүүдэд хийгдэх ажлын нэр бүхий тендерүүдийг авч өгсөн. Ингэхдээ Төрийн болон орон нутгийн өмчөөр бараа, материал худалдаж авах хууль журам, худалдан авах ажиллагааг зөрчиж давуу байдлаар барилгын болон бусад нэр бүхий тендерүүдийг авсан эсэхийг шалгуулах хүсэлтийг гаргасан байна.

Ер нь бол энэ асуудал аль аль талаасаа шүүхээр шийдэгдэхээр боллоо. Ерөнхий сайд Л.Оюун-Эрдэнийн шалгуулах хүсэлтэд дурдагдсан албан тушаал, улс төр дэх нөлөөгөө ашиглаж гаалийн байцаагч нарт нөлөөлсөн, өмгөөлөгч Б.Баасанцогттой хамтарч “Ариг” банкны асууддалд холбогдож, шүүгч нарт хахууль авч өгсөн гэх асуудлууд нь аль хэдийнээс яригдаж л байжээ. Тиймээс Л.Оюун-Эрдэнэ Ерөнхий сайдаар томилогдож байхдаа ч УИХ-ын чуулган дээр нэр дурдалгүйгээр С.Одонтуяад хэлж, анхааруулж байжээ.

Өөрөөр хэлбэл, С.Одонтуяа, түүний нөхөр Г.Өлзийбүрэн нартай холбогддог асуудлууд өнөөдөр л ил болж буй юм биш. Хөшигний ард удаан бугшсан. Тэдгээрийн нэгийг Ерөнхий сайд задалсан. Харин С.Одонтуяа нар түүнээс мөнгө нэхэж, “дайн” эхлүүллээ.

Одоо хэрэг асуудлуудыг АТГ болоод хууль хяналтын бусад байгууллага шалгана. Тэгээд шүүх шийднэ. Дашрамд дурдахад Ерөнхий сайдын хуулийн байгууллагад өгсөн хүсэлтэд маш ноцтой нотлох баримт, мэдээллүүд багтжээ. Тэгэхээр С.Одонтуяа 100 саяыг авах уу, зургаан хэргийн ялд унах уу гэдэг удахгүй шийдэгдэнэ гэсэн үг.  

Б.Дамдин-Очир

Эх сурвалж: “Зууны мэдээ” сонин