Arslan.mn

УИХ-ын гишүүн Ж.Сүхбаатар чуулганы үеэр хэвлэл мэдээллээр мэдээлэл өглөө. Тэрээр ковидын хуулийн учир дутагдалын талаар хэлэхдээ "Монгол Улс л ганцхан Ковидын хууль гэж тусдаа хууль гаргаж ирээд мөрдөөд байна. Гэхдээ энэ нь маш их учир дутагдалтай. Ковидын хууль нь гамшгийн тухай хуулиасаа тусдаа яваад байгааг ойлгохгүй байна. Хаана ч байхгүй ковидын хууль гэж гаргаж ирж байхаар гамшгийн тухай хуулиа сайжруулья л даа. Засгийн газрын ковидтой тэмцэх менежмент сүүлийн гурван сар үнэхээр муу байна. Одоо менежментээ өөрчлөх хэрэгтэй. Ийм хүнд байдалд байж байж наадам хийнэ гээд шийдвэр гаргасанд гайхаж байна.

Манай улсын ковидын тэмцэл тодорхойгүй байна. Гэтэл Канад улс гэхэд дөрвөн үе шаттай төлөвлөгөө гаргаад амжилттай хэрэгжүүлээд явж байна. Ковидын хуулийг нэг л удаа өөрчлөх заалттай байтал одоо тэр заалтаа өөрчилнө гээд сууж байна. Ковидын хуулийн гол дутагдалтай тал нь даргын шийдвэрээр бүх юм явна, хуулиа дагана гэсэн ойлголтгүй. Улсын онцгой комисс нь ковидын хуулиа сунгахгүй бол хүний амь аварч чадахгүй шүү гээд хариуцлагагүй юм яриад сууж байна.

Ковидын хуулиас болоод энгийн иргэд эмнэлгийн бусад төрлийн тусламж, үйлчилгээг авч чадахгүй байдал үүсч байна.

Эмнэлгийн ачаалал дийлдэхгүй байхад бид эрүүл мэндийн салбарыг дорвитой дэмжихгүй байгаад гайхаж байна. Наадмаа хийнэ, сүргийн дархлаа тогтоно, хярвал хяр гээд төрд байгаа хүмүүс хэнэггүй яриад сууж болохгүй. Энэ долоо хоногийн байдлаа харж байгаад ирэх долоо хоногийн шийдвэрээ гаргаад явж болохгүй. Нас барж байгаа хүмүүсээ бодохгүй уяачдаа бодоод наадам найр хийж болохгүй" гэлээ.