Arslan.mn

Монгол Улсын сайд, Засгийн газрын Хэрэг эрхлэх газрын дарга Д.Амарбаясгалан (2023.04.14) “Онцгой дэглэмийн хугацааг сунгах тухай” Улсын Их Хурлын тогтоолын төслийг Монгол Улсын Их Хурлын дарга Г.Занданшатарт өргөн мэдүүллээ.

Монгол Улсын Засгийн газрын 2022 оны 10 дугаар сарын 26-ны өдрийн 385 дугаар тогтоолоор “Эрдэнэс Тавантолгой” ХК-д онцгой дэглэм тогтоож, тус компанид Засгийн газрын Онцгой бүрэн эрхт төлөөлөгчийг томилон ажиллуулж байна. Онцгой дэглэмийн хугацаанд олборлолт, тээвэрлэлтийг оновчтой зохион байгуулах, борлуулалт, экспортыг нэмэгдүүлэх, нээлттэй, ил тод байдлыг хангах, нүүрсийг хил нөхцөлөөр, биржээр арилжих зэрэг зарим арга хэмжээг авч хэрэгжүүлснээр эерэг үр дүнд хүрсэн гэж Засгийн газрын Хэрэг эрхлэх газрын дарга Д.Амарбаясгалан танилцуулав. Тухайлбал, онцгой дэглэм тогтоосон 2022 оны 10 сарын 26-ны өдрөөс хойш 5 сарын хугацаанд 1,260.6 сая ам.долларын үнэлгээ бүхий 13.0 сая тонн нүүрс борлуулсан. Онцгой дэглэмийн хугацааны сарын дундаж үйлдвэрлэл, эдийн засгийн үзүүлэлт түүний өмнөх үетэй харьцуулахад эрс сайжирсан. Өнгөрсөн 2022 онд компанийн түүхэн дэх хамгийн өндөр орлого, ашигтай ажилласан жил болж, төсөвлөсөн цэвэр ашгийг 56 хувиар давуулан биелүүлж, цэвэр ашиг 1.3 их наяд төгрөгт хүрсэн. Нийт 7 удаагийн биржийн арилжааг амжилттай зохион байгуулж, 224 мянган тонн коксжих нүүрс, 192 мянган тонн эрчим хүчний нүүрс, нийт 416 мянган тонн нүүрсийг биржээр, хил нөхцөлөөр амжилттай борлуулсан гэлээ.

Тэрбээр үргэлжлүүлэн, “Эрдэнэс Тавантолгой” ХК-д онцгой дэглэм тогтоосон хугацаанд санхүүгийн нөхцөл байдал сайжирч, гадаад валютын орох урсгал нэмэгдсэн хэдий ч дээрх хүрээд буй үр дүнг тогтвортой хадгалах, цаашид улам сайжруулан “Эрдэнэс Тавантолгой” ХК-г олон улсын жишигт нийцсэн компани болгох зорилгоор дараах арга хэмжээг зайлшгүй авч хэрэгжүүлэх шаардлагатай байна гэв. Үүнд, олон улсад хүлээн зөвшөөрөгдсөн нэр хүндтэй хөндлөнгийн аудитын байгууллагаар аудит хийлгэх, нүүрсийг биржээр, хил нөхцөлөөр борлуулах үйл ажиллагааг жигдрүүлэх, компанийн засаглал, бүтэц, менежментийг сайжруулах, оновчтой болгох хэмээв.

Улсын Их Хурлын Үйлдвэржилтийн бодлогын байнгын хорооны 2023 оны дөрөвдүгээр сарын 11-ний өдрийн хуралдаанаар “Эрдэнэс Таван толгой” ХК-д тогтоосон онцгой дэглэмийн үед тодорхой үр дүн гарч эхэлснийг тэмдэглээд онцгой дэглэмийн хугацааг сунгах, Засгийн газрын онцгой бүрэн эрхт төлөөлөгчийг үргэлжлүүлэн ажиллуулах нь зүйтэй гэж дүгнэн Засгийн газраас холбогдох шийдвэрийг Улсын Их Хуралд өргөн мэдүүлэх нь зүйтэй гэсэн чиглэлийг ирүүлсэн аж.

Иймд дээр дурдсан үндэслэл, шаардлагын дагуу “Онцгой дэглэмийн хугацааг сунгах тухай” Улсын Их Хурлын тогтоолын төслийг боловсруулж, “Эрдэнэс Тавантолгой” ХК-д тогтоосон онцгой дэглэмийн хугацааг 6 сараар сунгах, уг онцгой дэглэмийн хугацаанд холбогдох хуульд заасан асуудлын хүрээнд шаардлагатай арга хэмжээг үргэлжлүүлэн хэрэгжүүлэх болон тогтоолын хэрэгжилтийг хангуулах, хяналт тавих, дагаж мөрдөх хугацааг уг тогтоолын төсөлд тусгажээ хэмээн Улсын Их Хурлын Хэвлэл мэдээлэл, олон нийттэй харилцах газраас мэдээлэв.