Arslan.mn

Төрийн ордонд дөнгөж сая МАХН болон МАН-ын хамтарсан ажлын хэсгийн ахлагчид болох УИХ-ын гишүүн Ч.Хүрэлбаатар, Ч.Улаан нар сэтгүүлчдэд мэдээлэл өглөө. Ажлын хэсгээс тус хоёр намыг 2016 оны УИХ-ын болон НИТХ-ын сонгуульд эвсэж оролцох нь зүйтэй гэсэн шийдэлд хүрчээ. Нэр дэвшигчдийн квот болон нэр дэвших асуудлыг өнгөрсөн 2012 оны сонгуулийн үр дүнг харгалзан үзэж байж шийдэхээр болсон гэнэ. Тодруулбал, 51:25 гэсэн зарчмаар нэр дэвшигчдээ хуваарьлах юм байна. Уг тоог задалж үзвэл МАН-аас ирэх сонгуульд тойрогт 33, намын жагсаалтад 18 гишүүн нэр дэвших бол МАХН-аас тойрогт 15, намын жагсаалтад 10 гишүүн багтах юм байна.

Ийнхүү тус хоёр нам удтал хүлээлт үүсгэж байж 2016 оны сонгуульд нэг нам эвсэл болж оролцохоор тогтсон байна.

Харин эвслийн даргаар МАН-ын дарга М.Энхболд, ТУЗ-ын даргаар МАХН-ын дарга Н.Энхбаярыг тус тус томилохоор шийдвэрлэсэн байна. Мөн хоёр нам ирэх сонгуулиас өмнө нэр дэвшигчидтэй нь холбоотой хуулийн байгууллагаас ямарваа нэгэн хууль бус хяналт шалгалт явуулбал үүнтэй хамтдаа тэмцэнэ гэдгээ мэдэгдлээ.

Тэд сэтгүүлчдэд мэдээлэл хийснийхээ дараагаар асуултад хариуллаа.

-Эвслийн гэрээ хэзээ байгуулагдах вэ?

УИХ-ын гишүүн Ч.Хүрэлбаатар:

-МАН-ын бага хурал хуралдаж байгаа. Маргааш төлөөлөх байгууллагууд хуралдана. Бага хурал дээрээ асуудлаа хэлэлцээд, хамтарч орох мөрийн хөтөлбөрөө хэлэлцэнэ. Энэ сарын 20-ноос өмнө  мөрийн хөтөлбөрөө хөтөлбөрөө боловсруулж холбогдох байгууллагад хүргүүлнэ. Тиймээс энэ сарын 20-ны дотор бүх шийдвэр гарсан байх ёстой.

УИХ-ын гишүүн Ч.Улаан:

-Сонгуульд орох нам, эвсэл дөрөвдүгээр сарын 30-нд СЕХ-нд бүртгүүлэх ёстой. Үүнээс өмнө буюу дөрөвдүгээр сарын 20-ны дотор эвсэж орох эсэхээ шийдэж, мөрийн хөтөлбөрөө боловсруулж, аудитын газар өгсөн байх ёстой. Маргааш манай бага хурал болно. Ажлын хэсгүүд мөрийн хөтөлбөр боловсруулах асуудлыг өнгөрсөн жилээс ажиллаж, ард иргэдээс санал асуусан. Цаг хугацаанд нь шийдэх бүрэн бололцоотой байгаа.

 -Жагсаалтыг  18:10  байхаар ярьсан байна  Дарааллыг нь яаж харгалзах вэ?

УИХ-ын гишүүн Ч.Хүрэлбаатар:

-Дарааллыг хэрхэн жагсаах талаар ярилцсан. 3:1 гэж тусгаж явахаар тохирсон.  

УИХ-ын гишүүн Ч.Улаан:

-Ажлын хэсгийн түвшинд шийдвэр гаргах хүрээнд ярьсан. Нэг бүрчлэн ярих бололцоо байхгүй. Бүтцүүд байгуулагдаад явахад арга механизмыг нэг бүрчлэн шийдвэрлэх боломж бүрдэнэ. Суурь зарчим дээр үндэслээд нэг бүрчилсэн асуудлаа тохироод явна.

Эвлийн нэрний тухайд ярилцсан болов уу?

УИХ-ын гишүүн Ч.Хүрэлбаатар:

-Эцсийн байдлаар тохирсон зүйл байхгүй. Гэхдээ ярилцсан хувилбарууд бий.

УИХ-ын гишүүн Ч.Улаан:

-Ярилцсан, санал нэгдсэн зүйл ч байгаа. Намын удирдах дээд байгууллага, шийдвэр гаргах байгууллагадаа бид саналаа оруулж байгаа.

 Г.Лхагваа