Arslan.mn

Ардын намынханд авах нэг том чанар бий. Яаж ч зодолдсон тогоон дотроо асуудлаа шийддэг, том эрх ашиг дээрээ нэгдэж чаддаг. Ардчилсан намынхан эсрэгээрээ албан тушаалын зодоондоо ард түмний нэрийг хавчуулдаг, ашигладаг, хувийн ашиг сонирхлоор нийлнэ, нэгдэнэ. Гудамжны зодооноо ардчилал гэж андуурдаг, эрх мэдлийн увайгүй хэмлэлдээнээ эрх чөлөө гэж эндүүрдэг. Ийм болоод л Ардчилсан нам өнгөрсөн 30 жилийн хугацаанд институци болж төлөвшиж чадсангүй.

СЕХ-ноос парламентад суудалтай гурван намын нэр дэвшигчийг бүртгэж авахдаа Ардчилсан намаас хуулийн дагуу нэг хүнийг нь бүртгэнэ гэсэн нэг л шаардлага тавьсан. Н.Алтанхуягийг С.Эрдэнэтэйгээ учраа олоод ир гэсэн биш нэг нь дүүжлүүлэхдээ тулж, нөгөө нь  өлсгөлөн, суулт болцгоов. 

Тэгвэл дөнгөж сая талбай дээр өлсгөлөн зарлаж буй АН-ын бүлгийн гишүүдтэй Ерөнхийлөгч Х.Баттулга гарч ирж уулзлаа. 

Тэрбээр ирсэн даруйдаа бүлгийн гишүүдийн нэрийг заан “Манай Ганибал хааччихсан юм бэ, АТГ дээр явж байгаа сурагтай байсан. Өөр манайхнаас хэлэх зүйл байвал хэл хэл”хэмээн тайлангаа хүлээн авч буй дарга мэтээр аашлав.  

Түүгээр ч зогсохгүй тэрбээр эрх баригч намынхан хүч түрж, асуудалд хандаж байгаа хэмээн илтэд нэг намыг дэмжиж, нөгөөг нь үгүйсгэсэн хандлага гаргаж орхив.

Угтаа Монгол Улсын Ерөнхийлөгч улс төрийн намаас татгалздаг албан тушаалтан бөгөөд Монголын ард түмний эв нэгдлийг илэрхийлэгч хүн байх учиртай.

Гэтэл энэ үеэр Ерөнхийлөгч “Би гишүүдтэйгээ ил ярьж болохгүй зүйлсийн талаар хэлэлцэхээр ирсэн юм. Энд ийм олон сэтгүүлчид байгааг мэдсэнгүй” гэх үгийг амнаасаа унагаж орхив.

Н.Алтанхуяг тэргүүтэй АН-ын гишүүдийн ард Ерөнхийлөгч Х.Баттулга чиглэл өгдөг гэдгийг намынх нь нөхөд хэлж байсныг Ерөнхийлөгч ийнхүү "баталчихав" бололтой.