Arslan.mn

Баян-Өлгий аймгийн ИТХ-ын анхдугаар хуралдаанаар аймгийн ИТХ дахь Ардчилсан намын бүлгээс аймгийн Засаг даргад Есентайн Зангарын нэрийг дэвшүүлж, төлөөлөгчдийн  100 хувийн саналаар дэмжиж Монгол Улсын Ерөнхий сайдад уламжлахаар болов.

Е.Зангар нь 1964 онд Баян-Өлгий аймгийн Алтай суманд төрсөн. Ам бүл 2, эхнэрийн хамт амьдардаг. Улсын багшийн дээд сургууль, Намын дээд сургуулийг төгссөн, багш мэргэжилтэй.

Түүний хувьд 2011-2016 онд аймгийн Гаалийн газрын орлогч дарга, 2016-2020 онд аймгийн Ардчилсан намын даргаар, мөн 2016-2024 онд аймгийн ИТХ-ын төлөөлөгчөөр тус тус ажиллаж байжээ. 

Тэгвэл шинээр Баян-Өлгий аймгийг удирдах   Е.Зангарын  АТГ-т мэдүүлсэн 2023 оны Хөрөнгө орлогын мэдүүлгийг танилцуулъя.

Тэрбээр 2023 оны хөрөнгө орлогын мэдүүлэгтээ “өөрөө 18 сая төгрөгийн орлоготой гэсэн бол гэр бүлийн орлогоо 17 сая хэмээн мэдүүлжээ. 

Мөн 473  сая төгрөгийн үнэ бүхий  орон сууцт, хашаа байшинтай , 68 сая төгрөгөөр үнэлэгдэх Toyota Crown, Lexus 250 маркийн машинтай  хэмээн мэдүүлжээ.

Мөн 75 сая төгрөгөөр үнэлэгдэх  2 эзэмших газартай,  малгүй, 200 сая төгрөгийн авлагатай ч, үнэт эдлэлгүй гэжээ.

2020-2023 онд тус аймгийн ИТХ-ын төлөөлөгчөөр ажилласан   Е.Зангарын  өөрийн орлого нь   2 сая төгрөгөөс  18 сая төгрөг болж өсөж, харин  гэр бүлийн  орлого нь 24 саяас 17 сая болж БУУРЧЭЭ.