Arslan.mn

Монголбанкны Ерөнхийлөгч Б.Лхагвасүрэн бодлогын хүүгээ 12 болгож, ус, дулааны үнээ нэмэхээр болсон шүү хэмээн хэвлэлийн бага хурал хийж, гэнэтийн бэлэг бариад удаагүй. Түүний бүрэн эрхийн хугацаа энэ онд дуусаж буй.

Б.Лхагвасүрэн нь элчин сайдаар томилогдох хүсэлтээ илэрхийлсэн гэх улс төрийн хөшигний ард яриа үүсээд буй. Түүний оронд УИХ-ын гишүүн асан Ч.Хүрэлбаатарыг томилохоор МАН тохироонд хүрчээ. МАН ч гэж дээ УИХ-ын дарга Д.Амарбаясгалангийн лүндэг ингэж буусан гэхэд хэлсдэхгүй. 

Тодруулбал, УИХ-ын дарга Д.Амарбаясгалан баруун бүсэд өвдөг шороодсон Ч.Хүрэлбаатарыг Монголбанкны Ерөнхийлөгчид нэр дэвшүүлэх бэлтгэл ажлаа нэгэнт хангажээ. УИХ-ын гишүүд спикерын дохиогоор томилгоог дэмжихэд бэлэн гэдгээ илэрхийлээд эхэлсэн сурагтай. Ч.Хүрэлбаатарын хувьд Монголбанктай ашиг сонирхлын зөрчилтэй гэж хэлж болно. Түүний эхнэр Н.Саранцэцэг Монголбанкны мөнгөн тэмдэгтийн газрын даргаар ажилладаг. АТГ-аас Монголбанкны Ерөнхийлөгчөөр ажиллаж байсан Н.Баярсайханыг баривчилсан дуулианы дараа Ч.Хүрэлбаатарын эхнэр н.Саранцэцэг тэтгэвэртээ гарахынхаа өмнө 36 сарын тэтгэмжээ яаралтай авах хүсэлтээ өгсөн гэх. Магад экс ерөнхийлөгчтэйгээ хамт чирэгдэхээс зайлсхийсэн биз. 

Үеийн үед сайд суудалд зандайлдаг, архаг улс төрч Ч.Хүрэлбаатар тун удахгүй эргэн ирэх нь ээ. Ирэх ирэхдээ төв банкыг атгаж, улсын мөнгөний бодлогыг чиглүүлэхээр ирэх нь. 

Монголбанкны улс төрчидтэй үеийн үед холбогддог ураг садны холбоо тасрахгүй улам батжин үргэлжлэх зураглал өнгөрсөнд, ирээдүйд хийгдэх томилгооноос тодорхой харагдаж байна.