Arslan.mn

Монгол Улсын Ерөнхийлөгч Х.Баттулгын бүрэн эрхийн хугацаа өнөөдөр /2021.06.25/ дуусч байна. Тэрбээр буухынхаа өмнө 13 хүнд уучлал үзүүлсэн бөгөөд түүний дотор Тагнуулын ерөнхий газрын дарга асан Б.Хурц, УИХ-ын гишүүн асан Д.Дамба-Очир нар багтсан талаар өмнө бид мэдээлсэн.

Ингэснээр Ерөнхийлөгч Х.Баттулга ЖДҮХС-ийн зээлийн асуудлаар ял аваад байсан хоёр ч ЖДҮ-чинд уучлал үзүүлэв.

Д.Дамба-Очир нь УИХ-ын гишүүнээр ажиллах хугацаандаа албан тушаалын байдлаа ашиглан Жижиг, дунд үйлдвэрийн дэмжих сангаас хамаарал бүхий этгээдийнхээ компанид нэн хөнгөлөлттэй зээл авч өгсөн хэргээр гурван жил зургаан сар хорих ял шийтгүүлсэн юм. Харин УИХ-ын гишүүн асан Г.Солтаны хувьд ЖДҮХС-гаас хамаарал бүхий компанидаа 950 сая төгрөгийн зээл авсан нь батлагдаж, гурван жилийн хорих ял сонсон эдэлж байсан бөгөөд 2021 оны гуравдугаар сард Ерөнхийлөгч Х.Баттулга уучлал үзүүлснээр суллагдсан юм.