Arslan.mn

Үндэсний эрх чөлөө, тусгаар тогтнолоо сэргээн мандуулсан өдрийг тохиолдуулан төрийн дээд цол, одон, медаль гардууллаа

Үндэсний эрх чөлөө, тусгаар тогтнолоо сэргээн мандуулсны 113 жилийн ойг тохиолдуулан Монгол Улсын Ерөнхийлөгч Ухнаагийн Хүрэлсүх зарлиг гарган, эрхэлсэн ажил, салбартаа өндөр амжилт гарган, эх орноо хөгжүүлэхэд үнэтэй хувь нэмэр оруулсан эрхмүүдэд төрийн дээд цол, одон, медаль хүртээлээ.

Өнөөдөр Монгол Улсын Ерөнхийлөгчийн зарлигаар морин хуур болон сонгодог хөгжмийн мастер урлаач Д.Түвшинтөрийг Хөдөлмөрийн Гавьяаны улаан тугийн одонгоор шагналаа. 

        Д.Түвшинтөр нь хөгжмийн зэмсэг урлалын салбарт 1989 оноос хойш өнөөг хүртэл тасралтгүй 35 жил ажиллаж байгаа Монгол болон олон улсад хүлээн зөвшөөрөгдсөн манай ахмад үеийн урлаачдын нэг бөгөөд өнөөгийн монголын морин хуур болон хөгжмийн зэмсгийн урлалыг шинэ шатанд гарч хөгжихөд өөрийн зүгээс үнэтэй хувь нэмэр оруулсан мастер урлаач билээ. Тэрээр 1990 онд БНМАУлсын Соёлын яамны мэргэжлийн комиссын шийдвэрээр 4-р зэргийн хөгжим урлаачын үнэмлэх авсан ба хожим 2000-2004 онд Итали улсад хийл болон нумт утсан хөгжмийн  мастер урлаачаар мэргэжлийн сургуулийг төгсгөн ирж өөрийн мэдсэн сурсанаа бусдад зааж сургах мөн өндөр хөгжилтэй улсын хөгжмийн зэмсэг урлалын жишгийг өөрийн улсад нэвтрүүлэхэд анхаарч хичээн ажиллаж ирсэн.

Мөн тус сургуульд суралцаж байх үедээ Итали улсын Ломбардиа мужийн гадаад оюутнуудад зориулсан мужийн диплом олгох, театрын тайзны технологийн дамжаанд суралцсан ба хожим төгсөж ирээд энэ чиглэлээрээ өөрийн улсдаа олон чухал томоохон төслүүдийг гүйцэтгэхэд оролцсоноос гадна соёлын салбарын нэн чухал салбар болох тайзны технологийн талаар Соёлын яамтай зөвлөгөө өгөх маягаар нягт хамтран ажиллаж орчин цагын театрын тайзны технологийг Монгол улсад нэвтрүүлэхэд, мөн тайзны стандарт боловсруулахад чухал хувь нэмэр оруулсан. Д.Түвшинтөр нь 2004 онд Монголын Хөгжмийн Зэмсэг Урлаачдын Холбоог анх санаачлан байгуулж анхны хөгжмийн зэмсгийн үзэсгэлэн зохион байгуулах урлаачдын мэргэжлийн чадавхийг дээшлүүлэх зэрэг олон ажлыг амжилттай  зохион байгуулж ирсэн.

Түүний хийж гүйцэтгэсэн ба оролцсон томоохон ажлуудаас дурдвал:

 Хөгжим урлалын ажил

Үндэсний Дуу Бүжгийн Эрдмийн Чуулгын морин хуур, их хуур хөгжмүүд, Улсын Филармоны дунд хуур, морин хуур, хийл, эрдүү хийл, виолончелл, контрабасс хөгжмүүд, Цэргийн Дуу Бүжгийн Эрдмийн Чуулгын хийл, эрдүү хийл, виолончелл хөгжмүүд, Нийслэлийн Улаанбаатар Чуулгын морин хуур, их хуур, хийл хөгжмүүд, Дуурь Бүжгийн Эрдмийн Театрын хийл, эрдүү хийл, виолончелл хөгжмүүд, БНХАУлсын ӨМӨЗОрны Ордос аймгын Дуу Бүжгийн Чуулгад морин хуур, их хуур хөгжмүүд, БНХАУлсын ӨМӨЗОрны Одон телевизийн харьяа Үндэсний Хөгжмийн Чуулгад морин хуур хөгжим

Тайзны технологийн ажил : 

Хэнтий аймгийн Хан Хэнтий Чуулгын тайзны технологийн зураг болон зарим гүйцэтгэлийн ажил, Дорнод аймгийн ХДТеатрын тайзны технологийн зураг, зөвлөхийн ажил, Говь-Алтай аймгийн ХДТеатрын тайзны технологийн зураг болон  гүйцэтгэл ажил, Архангай аймгийн ХДТеатрын тайзны технологийн зураг, Завхан аймгийн ХДТеатрын тайзны технологийн зураг, Хүүхэд Залуучуудын Театрын тайзны технологийн зураг болон зарим гүйцэтгэл ажил, Увс аймгийн Ойрад Театрын тайзны технологийн зураг, Хөвсгөл аймгийн ХДТеатрын тайзны технологийн зураг, Дундговь аймгийн Төв Халхын Дуулалт Театрын тайзны технологийн зураг, Төв аймгын ХДТеатрын тайзны технологийн зураг, ЦДБЭЧуулгын тайзны технологийн зураг болон  гүйцэтгэл ажил, Өмнөговь аймгийн ХДТеатрын тайзны технологийн зураг болон  гүйцэтгэл ажил, Дорноговь аймгийн Саран хөхөө Чуулгын тайзны технологийн зураг, Говьсүмбэр аймгийн Боржигон Чуулгын тайзны технологийн зураг, Ховд аймгийн Театрын тайзны технологийн зураг, Нийслэлийн Улаанбаатар Чуулгын тайзны технологийн засварын ажил зэргүүд болно.

Монгол Улсын Ерөнхийлөгч Ухнаагийн Хүрэлсүх төрийн дээд цол, одон, медаль хүртсэн эрхмүүдэд болон тэдний гэр бүл, хамт олонд нь амжилт хүслээ. Мөн Үндэсний эрх чөлөө, тусгаар тогтнолоо сэргээн мандуулсны 113 жилийн ойн баярын мэнд хүргэж, сайн сайхан бүхнийг хүсэн ерөөлөө.