Arslan.mn

Энэ удаагийн “Бизнес, хөгжил” буланд “Jump” солонгос хэлний сургалтын төвийн захирал, докторант Д.Тунгалагсэлэнгэтэй ярилцлаа.

-Монгол Улс сүүлийн хоёр жил танхимын хичээлийг хааснаар сургалтын төвүүдийн үйл ажиллагаа цахимд шилжсэн. Одоогийн нөхцөл байдал ямар байгаа вэ?

-Манай сургалтын төв 2018 оноос хойш солонгос хэлний сургалтын үйл ажиллагаа явуулж байгаа. Цар тахал эхлэхээс өмнө солонгос хэлний анхан, дунд, ахисан, ярианы болон Солонгос хэлний түвшин тогтоох шалгалт, гэрээний шалгалтад бэлтгэх олон ангитай, идэвхтэй үйл ажиллагаа явуулж байсан. Цар тахлын улмаас сургалтын төвийн үйл ажиллагаа танхимын хичээл гэсэн нэрийн дор хоёр жил алдаг оног ажиллалаа. Одоогоор бэлэн байдлын улбар шар түвшинд байгаатай холбоотой халдвар хамгааллын дэглэм баримтлан  10 хүртэлх хүнтэй танхимаар хичээллэхийг зөвшөөрсөн. Гэхдээ цар тахлын нөхцөл байдлаас шалтгаалж төрийн шийдвэр тогтворгүй байгаа учраас танхимаар олон анги нээж ажиллах нь эрсдэлтэй байгаа. Тиймээс зөвхөн Солонгос улс руу гэрээгээр ажиллах иргэдийн хэлний сургалтыг танхимаар зохион байгуулж байна.

-Цар тахлын нөхцөл байдлын улмаас ялангуяа, боловсролын салбарынхан сургалтын арга барилаа өөрчлөх шаардлагатай болсон. Энэ талаар дурдвал?

-Танхимын сургалтыг гүйцэх сургалтын өөр хөтөлбөр байхгүйг дэлхий нийт ойлгосон гэж бодож байна. Тиймээс цахим сургалтын чанарыг танхимын хичээлийн чанартай дөхүүлэх үүднээс олон боломжит хувилбарыг туршиж, судалж байна. Жишээлбэл, манай сургалтын төв Солонгосын хоёр их сургуультай хамтран цахим хэлний бэлтгэлийн ангийг хичээллүүлж эхэлсэн. Энэ нь Монголд эхний хоёр улирал солонгос багшаар заалгаад дараагийн хоёр улирал Солонгост сурах хөтөлбөр юм. Цаг үеийн нөхцөл байдалтай уялдуулж энэ хөтөлбөрийг явуулах болсон. Дэлхий нийтээр цар тахал тархсан энэ нөхцөлд Солонгост очоод адилхан цахимаар хичээллэх учраас Монголдоо цаг хугацаа, эдийн засгаа хэмнэх боломжтой гэж үзсэн. Энэ мэтээр цахим сургалтын чанарыг сайжруулах, сурагчдад сонирхолтой байлгах үүднээс шинэ арга барил, боломжийг судалсаар байна.

-Цахимаар хичээллэхэд сурагч, эцэг эхчүүдийн зүгээс танхимаар хичээллэх саналыг тавьдаг уу. Цахим сургалтын чанарыг үнэлбэл?

-Цахим сургалт хоёр жилийн хугацаанд үргэлжилсэн тул одоо хүүхдүүд цахим сургалтаас залхах, төвөгшөөх хандлагатай болсон. Цахим сургалт бол техникээр дамжиж харилцаж байгаа учраас амьд харилцаа үүсгэж чадахгүй байна. Танхимаар хичээллэхэд хичээлийн 100 хувийн ойлголтыг 80 хувьд нь ойлгодог бол цахимаар 60 хувьд нь ойлгож байна гэж үзэж болно. Ялангуяа, гадаад хэлийг цахимаар суралцах нь амаргүй. Цахим сургалт нь багш сурагчийн бие биеэ ойлгох, хичээлийн талаар тодруулах, сурагчийн дэвтэртэй ажиллахад бэрхшээлтэй байдаг. Хүүхдүүдийн зүгээс танхимаар хичээллэхийг үргэлж асууж байгаа. Хүүхдүүд дэлгэцийн ард удаан сууж эрүүл мэндэд нь сөргөөр нөлөөлж байгаа учраас эцэг эхчүүд танхимаар хичээллэх эсэхийг үргэлж асуудаг.

Сургалтын төвийн үйл ажиллагааг танхимаар эхлүүлэхэд тоног төхөөрөмж, байрны түрээс гээд олон асуудал давхар хөндөгддөг учраас тогтвортой үйл ажиллагаа явуулахгүй л бол санхүүгийн хувьд хүндрэлтэй байдаг. Тиймээс танхимаар хичээллэж чадахгүй байна.

-Хэлний сургалтын төвүүдэд ихэвчлэн гадаадад сурах зорилготой сурагчид суралцдаг. Цар тахалтай холбоотойгоор энэ хүүхдүүдийн сурах төлөвлөгөө хойшлох, цаг хугацаа алдах асуудал үүссэн тохиолдол бий юу?

-Хэлний сургалтад сууж байгаа ихэнх хүүхэд хэдэн сараар төлөвлөөд сургалтдаа сууж эхэлдэг. Коронавирусын халдварын улмаас хоёр жил дарааллан солонгос хэлний түвшин тогтоох шалгалт TOPIK хойшилсон. Энэ шалгалт нь манай улсад арав, дөрөвдүгээр сард буюу жилд хоёр удаа зохион байгуулагддаг. Энэ удаагийн шалгалтыг хойшлуулахад шалгалтад бүртгүүлсэн 3000 гаруй хүүхэд БШУЯ-нд өргөдөл, гомдол гаргасан ч цар тахлын улмаас үр дүнд хүрээгүй. Хойшлогдох тусам хэдэн мянган хүүхдийн төлөвлөгөө нурж жил алдаж байна.  Сургалтын төв мөн ялгаагүй төлөвлөгөөний дагуу сургалтаа оруулдаг. Солонгос хэлний түвшин тогтоох шалгалтад бэлдэх хүүхдүүдийн сургалтыг шалгалтнаас зургаан сараас өмнө сургалтдаа бүртгэдэг.

-Хөл хорионы улмаас сургалтын төвүүд танхимаар эсвэл цахимаар гээд тун тогтворгүй байсан. Байрны түрээс, төлбөрөө хэрхэн зохицуулж байгаа вэ?

-Улсаас цахилгаан, усны төлбөрийг чөлөөлсөн байгаа. Манай сургалтын төвийн үйл ажиллагаа явуулдаг газар нөхцөл байдлыг ойлгож түрээсийн төлбөрөө хөнгөлж байсан. Миний мэдэж байгаачлан олон сургалтын төв удаан хугацааны хөл хорионы улмаас хаалгаа барьсан. Тиймээс хувь хүний хөгжлийн олон суурийг олгож байдаг сургалтын төвүүдийн үйл ажиллагааг танхимын сургалт гэдэг нэрийн дор хаах биш дэмжиж ажиллахыг хүсэж байна.

-Сургалтын төвүүдийн эрх ашгийг хамгаалдаг нэгдсэн холбоо байдаг уу?

-Дөрвөн жилийн хугацаанд үйл ажиллагаа явуулсан ч сургалтын төвүүдийн нэгдсэн холбоо, байгууллагын талаар сонсож байгаагүй. Сургалтын төвүүд өөрсдөө бүх зүйлээ зохицуулаад ажилладаг.

-Дэлхий даяар коронавирусын дельта хувилбар хурдацтай тархаж нөхцөл байдал хүндэрсээр байна. Цаашид сургалтын төвийн үйл ажиллагаагаа танхимаар явуулах уу?

-Сургууль, цэцэрлэгийг бодвол сургалтын төвүүд цөөн хүнтэйгээр халдвар хамгааллын дэглэмээ баримтлаад үйл ажиллагаагаа явуулах боломжтой. Сургалтын төвөөр дамжуулан хувь хүнийг хөгжил, олон чадварыг сурч авдаг учраас удаан хугацаагаар хаах нь тохиромжгүй. Тиймээс үйл ажиллагаа явуулах тодорхой шаардлагуудыг тавьж танхимаар хичээллүүлэх хэрэгтэй байна.

Б.Бямбажаргал

Эх сурвалж: “Зууны мэдээ” сонин