Arslan.mn

Сэтгэцийн эрүүл мэнд ба стрессээ даван туулах аргачлалын талаар СЭМҮТ-ийн дэд захирал, АУ-ны доктор ЭМЯ-наас В.Баярмаа мэдээлэл өглөө.

1. Биеийн эрүүл мэнд
2. Сэтгэцийн эрүүл мэнд
3. Нийгмийн эрүүл мэнд

Сэтгэцийн хувьд эрүүл хүн ямар байдаг вэ?

Эрүүл хүн: Хүн сэтгэцийн хувьд эрүүл байх нь дасан зохицох чадвартай шууд хамааралтай байдаг.

Нэг үгээр ямар нэг сэтгэцийн эмгэггүй, амьдарч буй нийгэм хүрээлэн буй орчиндоо дасан зохицох чадвартай, өөрийн бүх чадваруудаа бүрэн дайчилж, үр дүнтэй ажиллаж, нийгэмдээ зохих хувь нэмэр оруулж байвал сэтгэцийн хувьд эрүүл хүн гэж үздэг.

Нийгмийн эрүүл бүлэг нийт хүн амын 60-70 хувийг эзэлдэг.

Сэтгэц нийгмийн тулгамдсан асуудалтай хүн: Энэ нь нийгэм-сэтгэлзүйн гаралтай, зохистой шийдвэрлэх шаардлагатай сэтгэцийн түр зуурын хямралд өртсөн хүнийг хэлдэг. Өнөөгийн нийгэмд сэтгэц нийгмийн тулгамдсан асуудалтай хүмүүс нийт хүн амын 20-25 хувийг эзэлж байна. Энэ нь нийт хүн амын сэтгэлзүйгээс хамаардаг ба зөв, эерэг аргаар даван туулах шаардлагатай юм.

Сэтгэцийн эмгэгтэй хүн: Өвчний олон улсын X ангиллын V бүлгийн "Сэтгэцийн болон зан үйлийн эмгэгүүд" хэмээх бүлэгт заасан шалгуураар оношлогдож болох өвчнөөр оношлогдсон хүнийг хэлдэг. Энэ нь нийт хүн амын 3-5 хувийг эзэлдэг.