Arslan.mn

Монгол Улсын Ерөнхийлөгчийн зарлигаар Халдварт Өвчин Судлалын Үндэсний төвийн Халдвар судлаач С.Оюунгэрэлийг "Алтан гадас" одонгоор шагнаж, шагналыг Эрүүл мэндийн дэд сайд С.Энхболд гардууллаа. 

Түүний хувьд ХӨСҮТ-д 2005 оноос ажилласан бөгөөд 2006 онд гар хөл амны өвчний, 2008 онд гахайн хавдрын,  2009 онд хүний томуугийн А хүрээний H1N1 вирусийн халдварын , 2011 оноос өмнө гепатит А-ын дэгдэлтүүд,  2015 оны улаанбурханы, 2019 оны холерийн, 2020-2022 оны ковидын,  2023 оны тарваган тахлын дэгдэлтүүдийн голомтыг удирдан ажиллаж ирсэн бөгөөд эмнэлгийн тусламж үйлчилгээтэй холбоотой халдвар гаргахгүй ажиллажээ.

2006 оноос тус төвийн хөдөлмөрийн аюулгүй ажиллагаа хариуцсан мэргэжилтэнээр хавсран ажиллаж, энэ хугацаанд нийт 25 орчим ажилтанд үйлдвэрлэлийн ослыг судлан бүртгэж, ОМ тогтоосон.       

ДЭМБ, ЭМЯ, АНУ-ын Жон Хопкинсийн их сургуультай хамтран Улаанбаатар хотын 5 хүртэлх насны хүүхдийн  дундах уушгины үрэвсэл, бактерит менингит, цусан үжил өвчний үүсгэгчийг тодорхойлж, өвчлөлийн түвшин, эмнэлзүйн онцлогийг  тогтоох, инвазив халдварын тандалтын тогтолцоог тогтвортой явуулан пневмококкийн эсрэг вакцины үр дүнгийн судалгаанд суурь мэдээлэл гаргаж өгөх судалгаанд 2007-2022 он хүртэл амжилттай оролцон, вакциныг Монгол улсад нэвтрүүлсэн.

НҮБ-ийн Хүүхдийн сангийн дэмжлэгтэйгээр зохион байгуулсан “Вакцины зохистой менежментийн үнэлгээ”-ний хүрээнд “Дархлаажуулалтын хог хаягдлын менежментийн шуурхай үнэлгээ”-г Эрүүл Мэндийн Яамны мэргэжилтэнгүүдтэй хамтран   2022 оны 1-5 сарын хугацаанд амжилттай зохион байгуулж,  7 аймаг, 4 дүүргийн нийт 26 эрүүл мэндийн байгууллагыг хамруулж, дархлаажуулалтын хог хаягдлын менежментийн өнөөгийн нөхцөл байдлыг тодорхойлон цаашид сайжруулах зөвлөмжийг боловсруулсан.

Фотокатализ ба электролиз усны технологиудийг хослуулан эмнэлгийн тусламж үйлчилгээтэй холбоотой халдварыг бууруулах туршилт судалгааг ШУТИС-Бизнесийн ахисан түвшний сургуулийн Тана лабораторитай хамтран хийж, хэрэгжүүлсэн.

Эмнэлгийн хэмжээнд "ISO 9001:2016 Чанарын менежментийн тогтолцоо"-г үйл ажиллагаандаа нэвтрүүлэх ажилд оролцсон бөгөөд 2023 оны 07 дугаар сард ISO 9001:2016 стандартийн шаардлагыг хэрэгжүүлэгч байгууллага болох баталгаажилтын гэрчилгээгээ Олон улсын  итгэмжлэгдсэн байгууллага 'SFCS" ХХК-аас гардан авахад чухал үүрэг гүйцэтгэсэн.

2018 оноос эхлэн ЭМЯ-ны Эрүүл мэндийн хөгжлийн төвийн эрүүл мэндийн байгууллагын магадлан итгэмжлэлийн шинжээчээр ажиллан, нийт 100 гаруй байгууллагыг магадлан итгэмжилсэн.

ЭМЯ-ны ажлын хэсгийн бүрэлдэхүүнд орж ажиллан, эрүүл мэндийн байгууллагуудад даган мөрдөх тушаал, журам, зааврыг боловсруулж, хэрэгжүүлж ажиллахад чухал үүрэг гүйцэтгэдэг.

Мөн тус төвийн Үйлдвэрчний Эвлэлийн Хороон даргаар хавсран ажилладаг бөгөөд хамт олныг төлөвшүүлэх, үлгэр жишээч тэргүүний хамт олон болоход мэдлэг чадвар хандлагаа зориулан ажиллаж, улсын хэмжээнд төрөлжсөн мэргэжлийн гуравдугаар шатлалын эмнэлгийг манлайлан ажилласан шилдэг мэргэжилтэн юм.