Arslan.mn

Эх Хүүхдийн Эрүүл Мэндийн Үндэсний төв "Перинатологийн клиник"-тэй болж байгаа бөгөөд тус клиник нөхөн үржихүйн насны эмэгтэйчүүд  болон эх ургийн чиглэлийн тусламж үйлчилгээг цогцоор нь үзүүлэх юм. Нөгөөтээгүүр, үйлчлүүлж буй эх хүүхэд, тэдгээрийн ар гэрийнхэн болон ажиллаж байгаа эмч, ажилчид таатай орчинд ажиллах нөхцөл боломж нь бүрдээд байгаа юм.

ЭХЭМҮТ нь эмэгтэйчүүдийн хавдар, дотоод шүүрэл, охидын тусламж үйлчилгээ, үргүйдлийн тусламж үйлчилгээ, цэвэршилтийн кабинет гэсэн чиглэлүүдэд үзлэг, оношилгоо, эмчилгээг хийн ажилладаг.

"Перинатологийн клиник"-тэй болсноор гарах боломжуудын талаар ЭХЭМҮТ-ийн Перинатологич эмч Г.Сансараас тодруулга мэдээлэл авсан юм. Тэрээр “Ургийн ямар нэгэн эмгэгт сэжиглэгдээд бусад аймаг, дүүргээс ирсэн жирэмсэн ээжүүдийг бид хүлээж авдаг. Ингэж ирсэн ургийн оношилгоог бид цогцоор нь хийж байна. Сүүлд Эрүүл мэндийн яамны санхүүжилтээр аваад байгаа аппарат маань маш өндөр хүчин чадалтай учраас ургийн аливаа гажиг, эмгэгийг эрт үед нь илрүүлэх боломжтой болсон” гэлээ.

Мөн тэрээр “Манай улсын хэмжээнд жирэмсэнтэй хавсарсан зүрх судасны болон бусад төрлийн архаг эмгэгтэй ээжүүд олширч байна. Бид эдгээр ээжүүдийг ч мөн хүлээн авч үйлчилдэг. Перинатологийн клиник бий болсноор эх хүүхдийн үзлэг оношилгоог цогцоор нь хийх боломж бүрэн нээгдэж байна” гэсэн юм.