Arslan.mn

Өнөөдөр Улсын хоёрдугаар төв эмнэлгийн Дүрс оношилгооны төвөөс “Эмнэлгийн орчинд ашиглагддаг рентген цацрагийн ашиглалт” түүний хамгаалалт сэдэвт сургалт, зөвлөгөөнийг зохион байгуулж байна.  

Сургалтын үйл ажиллагаанд Монгол Улсын Ардын эмч Р.Асай, УХТЭ-ийн Дүрс оношилгооны төвийн дарга Б.Эрдэнэбулган, Цацрагийн хамгаалалтын нийгэмлэгийн багш А.Ариунболор, БНСУ-ын техникч болон 120 гаруй эмч, мэргэжилтнүүд оролцлоо.

Энэ үеэр УХТЭ-ийн Дүрс оношилгооны төвийн дарга Б.Эрдэнэбулган хэлсэн үгэндээ “Рентгений хортой нөхцөлд ажилладаг 60 орчим эмч мэргэжилтнүүд манай эмнэлэгт ажиллаж байна. Эдгээр эмч нарыг рентгены хороос хамгаалах, рентгены тун хэр авсныг тооцдог аппаратыг эмч нар хэрэглэдэг.

Рентген туяанд хэт их өртвөл хүний дархлааны тогтолцоо гэмтдэг. Тиймээс бага насны хүүхдийг рентген туяанд аль болох өртүүлэхгүй байх хэрэгтэй. Бага насанд өсөлт хөгжил явагдаж, эсүүд хуваагдаж байдаг. Ийм үед нь рентгенд өртөөд байвал өртвөл яс болон булчирхайлаг хэсгүүд их гэмтэж, эсүүд гажуудаж, мутацид орон хорт хавдраар өвдөх эрсдэлийг нэмэгдүүлдэг.

Өмнө нь хатгаа туссан хүүхдийн цээжийн зургийг нь авахдаа 20-30 секунд орчим рентгенд харж авдаг байсан. Миний бие 2017-2018 онд ЭМЯ-нд ажилладаг байхдаа энэ асуудлыг хөндөж, хүүхдийн цээжийг рентген зургаар хэмждэг болгосон. Ингэснээр эмч нар одоо 1 секундийг 10 хуваасны 1-тэй тэнцэх хугацаанд цээжний зураг авч түүнийгээ уншдаг болсон.” хэмээлээ.

Сургалтын үеэр рентген цацрагийн талаарх хууль, дүрэм, журмыг мэргэжилтнүүдэд таниулах, хэрхэн рентген цацрагаас үйлчүүлэгч болон ажилчдаа хамгаалах, рентген туяатай шинжилгээнд орохгүйгээр асуудлыг хэрхэн шийдвэрлэх талаар мэдээллийг өгөх аж.

Мөн энэ үеэр

• Цөмийн энергийн комисс цацрагийн хамгаалалтын хууль дүрэм, цацрагийн хамгаалалт,
• Рентгений тухай ойлголт,
• Цацрагтай ажилчдын цацрагийн тун зэрэг олон илтгэлийг хэлэлцүүлэх юм.