Arslan.mn

Өчигдөр дэлхий нийтээр "Чихрийн шижинтэй тэмцэх өдөр"-ийг тэмдэглэн өнгөрүүлсэн. Бид энэ хүрээнд УНТЭ-ийн ДШСД-ийн төвийн их эмч, АУ-ны магистр Б.Золбоогоос чихрийн шижин өвчний талаар тодрууллаа. 

Чихрийн шижин өвчин нь чимээгүй тахал. Бусад өвчин нь хүний өвтгөж, шинж тэмдэг үзүүлдэг бол чихрийн шижин нь хүний биед ядрах, биеийн жингээ алдах, сульдах, хөлрөх, амьдралын идэвхийг л бууруулахаас л шинж тэмдэг илэрдэг. Чихрийн жишингийн далд үе нь 3-5 жил үргэлжилдэг. Энэ хооронд амжиж оношлуулаагүй тохиолдолд олон өвчний суурь болдог. 

Цусан дахь сахарын хэмжээ их байснаар хамгийн эхэнд судсуудыг гэмтээдэг учраас зүрх судас, мэдрэл, сонсголын бэрхшээл, хараагүйдэл зэрэг маш олон өвчний суурь болдог. Өөрөөр хэлбэл судсаар дамжиж бүх эрхтэнг гэмтээдэг. Тиймээс иргэд жилдээ нэг удаа урьдчилан сэргийлэх үзлэг, оношилгоонд хамрагдах хэрэгтэй. Хэрэв таны цусанд сахарын хэмжээ их гарвал нарийн мэргэжлийн эмчид үзүүлж, илүү дэлгэрэнгүй шинжилгээ өгөн эмчилгээг эхлүүлэх хэрэгтэй. 

Биеийн жингийн илүүдэлтэй иргэд чихрийн шижингээр өвчлөх тохиолдол их байдаг. Тиймээс эрүүл амьдралын хэв маягийг баримталж, жингээ хасах, тогтмол хөдөлгөөн хийх, эрүүл хооллох хэрэгтэй.