Arslan.mn

АШУҮИС-ийн харьяа Хангайн бүсийн Сувилахуйн сургалт, эрдэм шинжилгээ, эрүүл мэндийн тусламж, үйлчилгээний цогцолбор байгуулж, хөгжүүлэх ажлын хүрээнд аймгийн Засаг дарга Б.Цэрэннадмид АШУҮИС-ийн ректор Б.Дамдиндорж нар хамтран ажиллах гэрээнд гарын үсэг зурлаа.

Тус үйл ажиллагаанд Боловсролын яамны төрийн нарийн бичгийн дарга Х.Батжаргал, Хяналт-шинжилгээ, үнэлгээ, дотоод аудитын газрын дарга Н.Нарангэрэл болон их сургууль, орон нутгийн удирдлагууд оролцлоо.

АШУҮИС-ийн харьяа Хангайн бүсийн Сувилахуйн сургалт, эрдэм шинжилгээ, эрүүл мэндийн тусламж, үйлчилгээний цогцолбор нь 2025-2026 оны хичээлийн жилд Сувилагч, Уламжлалт анагаах ухааны сувилагч, Эм найруулагч, Нүүр амны техникч, Нүүр амны эрүүл ахуйч, Эмнэлзүйн лабораторийн технологич, Дүрс оношилгооны техникч зэрэг дэд бакалаврын 7 хөтөлбөрөөр Хангайн бүсээс элсэлт авч 09-р сарын 01-ээс сургалтын үйл ажиллагаагаа эхлүүлнэ. Мөн Уламжлалт анагаах ухаан, Нүүр ам судлалын эмнэлгийн тусламж үйлчилгээг эхлүүлэхээр ажиллаж байна.

Цогцолбор нь Хангайн бүсэд шаардлагатай эрүүл мэндийн салбарын хүний нөөцийг бэлтгэхээс гадна иргэдэд үзүүлэх эмнэлгийн тусламж үйлчилгээний хүртээмжийг нэмэгдүүлэх, орон нутгийн эмч, эмнэлгийн мэргэжилтнүүдийг чадавхжуулах, эрдэм шинжилгээ судалгааны ажил хийх зэрэг олон талын үйл ажиллагааг хэрэгжүүлэх юм.

Мөн АШУҮИС-ийн багш нар Хангай бүсийн эмч нарт "Эмнэлгийн мэргэжилтний ёс зүй, харилцаа хандлага" сэдвээр АШУҮИС-ийн БАС-ийн Харилцааны ур чадварын тэнхимийн профессор, АУ доктор С.Наранчимэг, "Өвдөлтийн менежмент", "Эрэмбэлэн ангилалт"сэдвүүдээр АШУҮИС-ийн АУС-ийн Яаралтай тусламж мэдээгүйжүүлэг судлалын тэнхимийн багш, зөвлөх зэргийн эмч, АУ магистр С.Бурмаа, "Цээжээр өвдөх хам шинж, түүний ялган оношилгоо, яаралтай авах арга хэмжээ" сэдвээр АШУҮИС-ийн АУС-ийн Зүрх судас судлалын тэнхимийн багш Х.Чингэрэл, "Цусны шилжилгээ, цус бүлэгнэлтийн шинжилгээний ач холбогдол" АШУҮИС-ийн АУС-ийн Цус судлалын тэнхимийн дэд профессор, АУ доктор А.Отгонбат, "Дүрс оношилгооны шинжилгээний хариу унших, багаар ажиллах, ялган оношилгоо" сэдвээр АШУҮИС-ийн АУС-ийн Радиологийн тэнхимийн профессор, АУ доктор Д.Мөнхбаатар багш, "Шүдний бүтэц ба үүрэг, шүд шүдлэх зүй тогтол, шүд цоорох өвчин үүсэх шалтгаан, түүнээс урьдчилан сэргийлэх аргууд, шүд цоорох өвчин ба хоол хүнс" сэдвээр АШУҮИС, НАСС-ийн ХНАСУС-ийн тэнхимийн ахлах багш, АУ-ны магистр, клиникийн профессор Ш.Мөнх-Од багш нар лекц сургалт орлоо.

Нүүр ам судлалын төв эмнэлгийн эмч нар Архангай аймгийн Цэцэрлэг сумын сургуулийн өмнөх боловсролын 1, 3, 5-р цэцэрлэгүүдийн шүд угаалтын цэгтэй танилцаж сургалтын арга зүйч, эмч нарт зөвлөмж өгч, хүүхдүүдэд шүд угаах аргыг зааж өглөө.