Arslan.mn

Наран мандал уурхайн кемпийн туслах ажилтан Д. Мягмарцэцэнгийн сэтгэгдлийг хүргэж байна.

Манай аав, ээж Баян-Овоо сумын 3 дугаар багын малчин байсан. Би аймгийн төвд төрж өссөн бөгөөд 2013 онд 3 дугаар сургуулийг төгсөөд барилга дээр ажиллаж ажлын гараагаа эхэлж байсан. 2019 онд Цагаан цахир уурхайн ажлын байрны зарын дагуу анкет бөглөөд, ярилцлагад ороод 11 сард кемпийн галчаар ажиллаж эхэлсэн. 

Миний ажлын байрны үүрэг бол уурхайн кемп орчмын оффис, ажилчдын амрах байр, гал тогооны халаалтыг хариуцаж, дулаан байлгах гол галлагааг хийж, дулаанаар хангахад чиглэдэг. Өглөө бүр кемп менежерээс ажлын байрны аюулгүй ажиллах зааварчилгаа авснаар ажил эхэлдэг. 

Нүүрсээ буулгаж, галлагаанд бэлдэх, зуухыг тасалдалгүй байнга галтай байлгах, хий алдах, шугам задрах зэрэг эрсдэлээс байнга сэргийлж, маш анхаарал болгоомжтой, няхуур ажиллахыг шаарддаг. Өвөл, хаврын цагт галчаар ажиллаж, зун намарт кемпийн туслахаар хөрвөж ажилладаг онцлогтой сонирхолтой ажил шүү миний алба. 
Уурхайн зүгээс аюулгүй ажиллах сургалтуудыг байнга, давтамжтай өгдгөөс гадна Даралтат савны сургалтад хамруулж гэрчилгээ олгосон нь сайхан санагддаг. 

Цаашид би хүнд машин механизмын операторын сургалтад сууж, мэргэжилтэй болох талаар бодож байгаа. Дөнгөж арван жилийн боловсролтой гэлгүй намайг ажилд авч, зааж сургаж, өдий дөрөв дэх жилийн нүүртэйгээ золгон ажиллуулж байгаа компанидаа, тэр дундаа багш минь болсон Баянжаргал, Магван, Лхам нартаа маш их баярлаж, хүндэлж явдаг. 

Хэдийгээр залуу хүн боловч би дөрвөн сайхан үртэй эцэг хүн. Том маань хүү, тэгээд дунд охин, хоёр ихэр хүүтэй өнөр бүлтэй өрхийн тэргүүн. Хүүхдүүдээ ирээдүйд боловсролтой, мэргэжилтэй болгохын төлөө одооноос хичээн ажиллаж байна.  Би уурхайд анх ажилд орохдоо яг юу хийх талаараа огтхон ч мэдэхгүй байсан, харин одоо бол уурхайчдын аятай таатай ажиллаж, амьдрах орчныг бүрдүүлдэг арын албаны аж ахуйн хэлтсийн нэг эд эс болсон.
Би ажилдаа үнэхээр дуртай, хамт олондоо хайртай, цаашид бүр их хичээнгүйлэн ажиллах болно.