Arslan.mn

Эрдэнэт үйлдвэр ТӨҮГ өдөр тутмын үйл ажиллагаандаа зориулан олон төрлийн худалдан авалт хийдэг. Худалдан авалт нь 15 сая төгрөгөөс дээш бол хуулийн дагуу тендер зарладаг. Өнөөдрийн байдлаар тус үйлдвэрээс яаралтайгаар, бэлэн байгаа хүнд даацын 33А51 дугуй худалдан авах  19 380 000 000 /арван есөн тэрбум гурван зуун наян сая төгрөг/ төгрөгийн тендер зарласан байна. 

Нээллттэй мэдээлийн сангаас үзэхэд тус тендерт 
1.    Эйч Эл Кэй Эм Эн ХХК
2.    Новел лизинг ХХК
3.    Трансвайд солюшн ХХК
4.    Юнайтед мерс машинери ХХК гэх дөрвөн байгууллага “хүч үзэж” байгаа юм байна. 

Тендерт зөвхөн бэлэн дугуйтай байгууллагууд оролцохоор байгаа юм. Харин тус байгууллагууд үнэхээр дугуй байгаа эсэхийг бид тодрууллаа. 

Эйч Эл Кэй Эм Эн ХХКомпанийн хувьд бэлэн дугуй байгаа бөгөөд биднийг очиж дугуйн зургийг авч болно гэв. 
Новел лизинг ХХК-ийн хувьд албан бичгээр хандахыг хүсэж, дугуй бэлэн байгаа эсэх мэдээллээ Эрдэнэт үйлдвэр ТӨҮГ-т явуулсан болохоор хэвлэл мэдээллийн байгууллагад энэ тухай мэдээлэх нь “хууль бус” хэмээн үзэж байгаагаа ч нуусангүй. 

Трансвайд солюшн ХХКомпанийн Хятад дахь салбарт дугуй бэлэн байгаа. Хэрвээ тендерт шалгарсан тохилдолд дугуйг яаралтайгаар оруулж ирэх боломжтой гэдгээ тендер захиалагч талд мэдэгдсэн байна. 

Харин Юнайтед мерс машинери ХХК энэ талаар мэдээлэл өгөхгүй. Хэвлэл мэдээллийн байгууллагыг хэн нэгний захиалгаар хөдөлж байна хэмээн хардаж байгаагаа илэрхийлсэн юм. 

Өөрөөр хэлбэл тендерт оролцож байгаа дөрвөн байгууллагын хоёр нь  л бэлэн дугуйтай. Гэхдээ нэг нь хилийн чанадад, нөгөө нь Монголд бэлэн байгааг хэлж байв. Бусад нь ямар нэгэн байдлаар дугуй байгаа эсэх нь эргэлзээтэй болж таарч байна. Хэрвээ  тендерт зарласан шиг хүнд даацын дугуй бэлэн байсан бол түүнийгээ хэвлэл мэдээллийн байгууллагад үзүүлээд нээлттэй хамтран ажиллах байв. Харин нээлттэй мэдээллийг ямар нэг байдлаар “хүндрэл учруулж” байгаа нь бэлэн дугуй байхгүй гэсэн эргэлзээг олон нийтэд өгөхөөр байна. 

Манай сайтын зүгээс нээлттэй зарласан тендерт ийнхүү хөндлөнгийн “хяналт тавьж” байгаа нь нэг талаас улсын ажил зогсохоос сэргийлж байгаа хэрэг юм. Нөгөө талаас улсын хөрөнгөөр хэдэн тэрбум төгрөгийн худалдан авалт хийж байгаа энэ мэт тендерүүд ямар нэг байдлаар “хайнга”, гаднын нөлөө орохоос сэргийлж байгаа хэрэг юм. 
Мөн Эрдэнэт үйлдвэр ТӨҮГ-ын зүгээс дугуй бэлэн байгаа эсэхийг очиж хянаагүйг оролцогч болон тендер зарлагч байгууллага ч хэлж байлаа. Оролцогчдыг өөрсдөө зураг бичлэг зэрэг баримтаа өг гэх байдлаар хандсан нь тендер будлиантай болох эрсдэлтэй байгаа юм. Будлиан байж болзошгүй энэ мэт үйлдлүүд хэдэн жил үргэлжилсэн бэ гэх хардлага төрүүлж байна. 

Тендерийн хариу одоогоор гараагүй байгаа. Тендерийг шалгаруулагч Эрдэнэт үйлдвэр ТӨҮГ-ын ажилтан “Ямар нэг хувийн ашиг сонирхол байхгүй. ” гэдгээ мэдэгдсэн. 

Бид дараагийн цувралаараа тухайн байгууллагуудын хэн нь ямар тендерт оролцож байсан талаар болон дугуйг хэзээ гаалиар оруулж ирсэн эсэх, хэн нь ялсан гэх зэрэг мэдээллийг хүргэх болно. 
Мөн Эрдэнэт үйлдвэр ТӨҮГ-ын будлиантай байж болзошгүй тендерүүдийн мэдээллийг цувралаар хүргэх болно. 

https://www.tender.gov.mn/mn/result/detail/1666404032186

А.Баярмаа