Arslan.mn

Авлигаас урьдчилан сэргийлэх Олон нийтийн дэд зөвлөлийн Дархан-Уул аймгийн гишүүн Д.Энхтуяагаас мэдээ ирүүлжээ.

Тэрээр “Согтууруулах ундаа худалдах, түүгээр үйлчлэх үйл ажиллагаа явуулах тусгай зөвшөөрөл олгох, хяналт тавих журам”-ын төслийг судлаад хүнд суртал, авлига гарах нөхцөл боломж агуулж байгаа эсэх талаар нөлөөллийн үнэлгээг хийж тодорхой саналыг тус аймгийн Засаг даргын Тамгын газрын холбогдох мэргэжилтэнд өгчээ.  

Түүнчлэн аймгийн Төрийн албаны салбар зөвлөлөөс зарласан удирдах албан тушаалтны сонгон шалгаруулалтын явцыг хянаж ажиглалт хийсэн байна.

Сонгон шалгаруулалтад оролцогчдыг төдийгүй шалгалтын комиссын гишүүдийг хяналтын камераар харах боломж бүрдүүлэх, суудлыг хуваарилах биш өөрсдөө сонгох эрхийг олгох зэрэгт анхаарч ажиллахыг зөвлөв.

Дархан-Уул аймаг дахь авлигаас урьдчилан сэргийлэх Олон нийтийн дэд зөвлөлөөс төрийн үйлчилгээг сайжруулах чиглэлээр хэд хэдэн санал гаргаж байгаагаа танилцууллаа.

Тухайлбал, төрийн байгууллагаас эрх олгох, татгалзах, түдгэлзүүлэх, сунгах, хүчингүй болгох, сэргээх, хяналт тавих, шаардах гэх зэрэг олон төрлийн эрхийг нэгтгэж иргэдэд үзүүлэх төрийн үйлчилгээний хүнд суртлыг багасгах, энэ талаар Авлигатай тэмцэх үндэсний хөтөлбөрийн 4.1.2.2-т заасныг хэрэгжүүлэх, төрийн байгууллага болон албан тушаалтны ажлыг дүгнэхдээ иргэдэд хүнд суртал, чирэгдэлгүй үйлчилсэн гэсэн үзүүлэлтийг харгалзах санал гаргажээ. 

Эх сурвалж: АТГ