Arslan.mn

Төрийн албан хаагчдад ажлын үр дүнгийн урамшуулал болгож 300 мянган төгрөг олгох шийдвэрийг УИХ-аас гаргаж, санхүүжилтийг 2017 оны төсвийн тодотголд тусгасан.

Урамшууллын санхүүжилтийг өнгөрсөн баасан гарагт Сангийн яамнаас Аймаг, нийслэлийн төрийн сангийн хэлтсүүд рүү шилжүүлсэн бөгөөд өчигдрөөс эхлэн төрийн албан хаагчдын дансанд шилжиж байна.

Үр дүнгийн урамшууллын мөнгийг төрийн өндөр албан тушаалтан, шүүгч, прокуророос бусад төрийн албан хаагчдад ажлын үр дүнд нь уялдуулан тооцож олгох юм.

"Урамшуулалд энэ онд 55.6 тэрбум төгрөг зарцуулахаар төлөвлөсөн. Хуульд зааснаар энэхүү урамшууллаас хувь хүний орлогын албан татвар 10 хувь, төрийн албан хаагчийн төлөх нийгмийн даатгалын шимтгэл 10 хувийг тус тус суутгана.  Тэгэхээр төрийн албан хаагчийн дансанд 243 мянган төгрөг орно. Урамшууллыг ондоо багтаан олгож дуусна” хэмээн Хөдөлмөр, нийгмийн хамгааллын сайд С.Чинзориг тайлбарлав.

Урамшууллыг жирэмсний амралттаа авсан болон түр хугацаанд чөлөө чөлөөтэй байгаа хүн болон түүнийг орлож байгаа хүнд давхардуулан олгох  боломжгүй. Иймд 300 мянган төгрөгийн урамшууллыг тэдгээр ажилтны аль алинд нь тухайн жилд ажилласан хугацаа буюу сарыг харгалзан хуваарилах юм байна.