Arslan.mn

Говь-Алтай аймагт баригдах дулааны станц, дулааны шугамын техник эдийн засгийн үндэслэл боловсруулах ажлын хэсэг аймагт ажиллаж байна.

БНСУ-ын хөрөнгө оруулалтаар дулааны станц барих 10 аймгийн нэгд Говь-Алтай аймаг багтаад байгаа юм.

Уг аймгийг дулаанаар хангагч “Мандал голомт” компани жил ирэх тусам өсөн нэмэгдэж байгаа орон сууцнуудыг халаалт дулаанаар хангаж чадахгүй байдалд хүрээд байна.

Алтай нутгийн иргэдийн тухайд улсдаа дээгүүрт ордог халаалтын хөлсийг төлдөг ч даарч зутран эрүүл мэнд эдийн засгийн тухайд хохирч суудаг бэрхшээлээс гарах нэг алхам хийгдэж байна хэмээн үзэж байгаа юм.

Тус ажлын хэсэг аймгийн удирдлагуудтай уулзан өнөөгийн нөхцөл байдалтай танилцлаа. Мөн дулааны станц барих газрыг үзэх, аймгийн төвийг дулаанаар хангаж буй уурын зуухнуудаар орох юм байна.

Ажлын хэсэгт эрчим хүчний яамны бодлого төлөвлөлтийн газрын ахлах мэргэжилтэн Энхтуяагаар ахлуулсан бүрэлдэхүүн, “УБДС” ТӨХК-ий инженер Батцэрэн, Солонгосын “KDHEC” компанийн төлөөлөгчид “Грийн энержи” интернэйшнл ХХК-ий төлөөлөл газар дээр нь ирж өнөөгийн нөхцөл байдалтай танилцан холбогдох судалгаа материалыг боловсруулж байна.