Arslan.mn

Хөдөлмөрийн аюулгүй байдал, эрүүл ахуйн сургалт, гэрээт болон зөвлөх үйлчилгээгээр дагнан ажилладаг “Ололт амжилтын түлхүүр” ТББ нь өнөөдөр Монголын нийгэмд бэлтгэгдэн гарч буй ХАБЭА-н ажилтны тодорхой хувийг чанартайгаар бэлтгэн гаргадаг энэ салбарын тэргүүлэх үйлчилгээтэй байгууллагын нэг юм. Шинийг эрэлхийлж, хүлээлтээс давсан үйлчилгээ үзүүлэх зорилготой энэ багийн залуус өнгөрсөн онд ISO 9001 олон улсын чанарын менежментийн тогтолцоог нэвтрүүлж салбартаа тулгамдаж буй асуудлуудыг шийдэхээр ажиллаж байна. Бид энэ удаад тус байгууллагын сургалтын менежер Э.Батболдтой ярилцлаа.

-Ижил чиглэлийн үйл ажиллагаа явуулдаг байгууллагуудаас хамгийн эхэнд танай байгууллага ISO 9001 олон улсын чанарын менежментийн тогтолцоог нэвтрүүлжээ. Ингэснээр юу өөрчлөгдөх вэ?

-ISO 9001 стандарт нь байгууллагын чанар, түүнийг удирдан, хянаж, сайжруулах удирдлагын тогтолцоо юмаа. Өөрөөр хэлбэл бодлого, зорилтуудыг тогтоож, тэдгээр зорилтуудад хэрхэн хүрэх талаар ажилладаг тогтолцоо гэж ойлгож болох бөгөөд түүнд хүрэхэд 131 шаардлагыг хангаж байж стандартыг хангасан гэж үздэг. Мэдээж стандартыг хангаж ажилласнаар өмнө нь явж ирсэн зам маань учир дутагдалтай харагдаж эхэлсэн. Тухайлбал Нийгмийн хамгаалал, хөдөлмөрийн сайдын А/33 тушаалд ХАБЭА-н ажилтанг 40 болон түүнээс дээш цагаар бэлдэнэ гэж заасан байдаг. Манай салбарын дийлэнх хувь нь хамгийн доод буюу 40 цаг түүнээс арай илүү цагаар ХАБЭА-н ажилтанг бэлтгэж ирсэн нь үнэхээр хангалтгүй хугацаа юм. Хүний амь нас эрүүл мэндийг хамгаалах үүрэг хүлээсэн хүн 40 цагийн сургалтаар юу сурах вэ гэдэг нь манай салбарын тулгамдсан асуудал. Бидний хувьд ч мөн адил. Тийм учраас Ололт амжилтын түлхүүр ТББ нь сургалтын чанарыг сайжруулахаар дөрвөн сарын хугацаатай 272 цагийн сургалт явуулахаар бэлтгэл ажлаа дуусгаад элсэлтээ авч байгаа. Энэ сургалт маань мэргэжлийн англи хэл, хувь хүний ур чадвар, мэргэжлийн ур чадвар гэсэн үндсэн чиглэлүүдээр явагдаж, хүний амь нас, эрүүл мэндийг хамгаалах чадвартай бүрэн төгс мэдлэг,туршлагатай ХАБЭА-н асуудал хариуцсан ажилтныг бэлтгэх юм.

-Танай төв байгуулагдаад хоёр жил гаруйн хугацаанд 7 мянга орчим хүн сургасан тайлан байна. Тэдгээрийн хэдэн хувь нь хүний амь нас эрүүл мэндийг хамгаалах үүрэг хүлээсэн 40 цагийн “бүтээгдэхүүнүүд” вэ?

– Энэ нь ХАБЭА-н ажилтан, нийт ажилчдын сургалт, сэрээт ачигч, даралтат сав шугам хоолой, ажил олгогч эздийн дээд болон дунд шатны гэх мэт 10 төрлийн сургалтуудад нийт 7 мянган хүн хамрагдсан гэсэн үг л дээ. Үүнээс ХАБЭА-н асуудал хариуцсан 70 гаруй ажилтныг 53 цагийн сургалтаар бэлтгэж гаргасан байгаа. Энэ чухал мэргэжлийг 40 цагаар бэлдэж талх шиг үйлдвэрлээд байгаа нь ажлын байран дээр гарахаараа түүхий, чадваргүй байгаа нь мэдэгдээд байна. харьцангуй манай төгсөгчдийн 81 хувь нь ажлын байртай болоод байгаач сургалтын чанарыг сайжруулах ёстойг цаг хугацаа, нийгмийн хэрэгцээ шаардаж байна.

-Боловсон хүчний тухайд..?

-Манайх сургалт судалгаа, зөвлөх үйлчилгээ ба гэрээт үйлчилгээний албатай. Боловсон хүчний тухайд МУ-ын зөвлөх инженер, ХАБЭА-н Магистр, ХАБЭА-н мэргэшсэн мэргэжилтэн, ОУ-ын тэргүүлэх Аудитор зэргээс бүрдсэн 16 үндсэн ажилтантай үйл ажиллагаагаа явуулж байгаа. Хүний нөөцийн сонгон шалгаруулалт маань ISO 9001 стандартын зарчмаар явагддаг. Өөрөөр хэлбэл бид сонгосон ажилтнаа илүү мэргэшүүлэх зорилгоор ажилтны хөгжлийн хөтөлбөрт хамруулан дотоодын болон гадны хэрэгцээт сургалтуудад сургаж дадлагажуулан эхлэхэд, өрнөхөд, дуусахад түвшин болон чанарыг үнэлж ажиллуулдаг учир сайн багш, сайн ажилтныг эгнээндээ нэгтгэж ажиллаж байна.

Тэгэхээр одоо Ололт амжилтын түлхүүр сургалтын байгуулагын онцлогийг ярих нь зүйтэй болов уу?

-Чанарын менежментийн тогтолцоог үйл ажиллагаандаа нэвтрүүлэн хэрэгжүүлж байгаа болохоор хэрэглэгчийн хэрэгцээ шаардлагыг түрүүлэн мэдэрч, хангаж өгдөгөөрөө онцлогтой. Тухайлбал нийт ажилчдын сургалт л гэхэд тухайн байгууллагын үйл ажиллагааны онцлог чиглэлд тохирсон төрөлжсөн сургалтыг явуулж байна. ХАБЭА-н асуудал хариуцсан ажилтны сургалтын хувьд хамрагдаж байгаа суралцагчдаас түвшин тогтоох тестийн шалгалтыг сургалт эхлэхээс өмнө авч, төгсөлтийн шалгалтыг 3 хэлбэрээр авдаг.

– Танай салбарт хүндрэлтэй ямар асуудал байна вэ?

– Тэргүүлэх салбарууд нь асар хурдацтай, үйлдвэрлэгч, бүтээгчид эрчимтэй хөгжиж байгаа энэ нийгэмд бид ХАБАЭ-н ажилтанг чиглэл чиглэлээр нь төгс бэлдэж гаргаж чадахгүй байгаа нь асуудал болоод байна. Ижил чиглэлийн үйл ажиллагаа явуулж байгаа байгууллагуудын сургалтын хөтөлбөрүүд их зөрүүтэй, арга барил нь өөр өөр байна. Энэ нь тухайн салбарт нь тохирсон биш суурь мэдлэгтэй, туршлага нимгэн ХАБЭА-н ажилтнуудыг бэлтгэхэд хүргээд байгаа юм.

-Сургалтын программ нь өөр өөр яваад байна гэсэн. Одоо яах ёстой вэ?

Сургалтын төвүүд бид нэгдэл ч юмуу холбоо байгуулж цаашдаа нэгдсэн арга барилтай, нэгдмэл алсын хараатай, нэг стандартаар явах шаардлага байгаа.
Үүний тулд манай байгууллага өөрсдийн чадах хэмжээнд эхний алхмыг тавьж жишиг тогтоохоор ажиллаж байна. Бид энд хэн нэгнийгээ шүүмжлэх бус хамтдаа сайжрах ёстойгоо ярьж байна. Мөн бусад байгууллагууддаа хандаж бид сайжрах, хөгжих цаг иржээ. Бид сайжирч танд хамгийн өндөр түвшний мэдлэгийг олгохоор хичээж байгааг ойлгуулах нь чухал юм.

-Энд эхлээд соёл иргэншлийн тухай дурьдах нь зүйтэй байх. Яагаад монголчуудын дунд осол өсөөд байна. хөгжингүй орнуудын хувьд ХАБЭА-г яагаад ийм сайн мөрдөөд байна вэ гэдгийг бодох хэрэгтэй. Энэ нүүдлийн болон суурин иргэншилтэй холбоотой. Монголчуудад аюулгүй ажиллагаа байсан уу гэвэл байсан. Тодруулбал: Тэр нь муу ёр гэж үздэг байсан. Жишээ нь: Хүүхдэд чөмөг идүүлдэггүй, уурга унадаггүй г.м. Учир нь чөмөг идвэл бэлгийн бойжилтод сөргөөр нөлөөлдөг гэдгийг томчууд мэддэг байсан. Түүнийгээ яагаад гэдэг гол учир шалтгааныг хүүхдэд тайлбарлаж өгдөггүй байсан. Энэ нь монголчууд аюулгүй амьдрах ухаан байсан боловч түүнийг шинжлэх ухаанд тулгуурласан соёл болгож чадаагүй юм. Харин Европчууд суурин иргэншилтэй байсан учраас орчиндоо аюулгүй ажиллагааг шинжлэх ухаанд тулгуурласан соёл болгож чадсан. Тэгэхээр бид цаашдаа сургалтын хөтөлбөрийн агуулгаа эхлээд соёл иргэншил уламжлал ёс заншилтайгаа холбоод дараа нь европ стандарттай уялдуулах нь чухал юм.

– Байгууллага ХАБЭА-тай болсноор…?

– ХАБЭА-н ажилтан гэхээсээ илүүтэй байгууллагад аюулгүй ажиллагааг хэрэгжүүлэх ямар шалтгаан байна вэ? гэдгийг нэн тэргүүнд бодох хэрэгтэй. 1. Ёс суртахууны 2. Хуулийн 3. Эдийн засгийн шалтгаанууд байгаа гэдгийг байгууллагын удирлага ухаж ойлгосон цагт ХАБЭА-н ажилтантай болсноор………………? гэдгийг бүрэн ойлгох болов уу. (Инээв)

-ХАБЭА-н асуудал хариуцсан ажилтнаар хэн сурч болох вэ?

-Хуулиараа бол хуульч, инженер, эрүүл ахуйн чиглэлээр төгссөн хүмүүсийг бэлд гэж заасан ч тэр хэмжээний хүний нөөц нь манайд алга байна. Яалт ч үгүй нөхцөл байдал хөгжлийн хувьд хүн бүхэн мэдэх ёстой амьдралын зарчим учраас хүмүүс сонголтоо хийгээд сураад явж байна.

-Мэдээж аливаа үйлст түүчээлж явахад уриалах эрх тэнд байдаг. Бусаддаа хандаад юуг хэлмээр байна?

-Нийгмийн сэтгэлзүйг, хөдөлмөрийн салбарт хөдөлмөрлөж буй байгууллагуудад эрүүл, аюулгүй, осолгүй ажиллах нь маш чухал бөгөөд энэ нь бидний хоол унднаас дутахгүй хэрэгцээ гэдгийг ойлгуулах нь бидний үүрэг юм.

Энэ үүргийн хүрээнд манай хамт олон маань аюулгүй ажиллагааны салбарт өөрсдийн хэмжээнд хувь нэмрээ оруулъя гэж ханцуй шамлан хичээн ажиллаж байна. Удаан хугацаанд тогтсон хангалтгүй жишиг, хөгжил байхгүй үйл явцгүй системийг сайжруулж дэвшилтэт шатанд гаргаж нэвтрүүлье гэж уриалмаар байна. Байгууллагууд бие биенийгээ өрсөлдөгч гэж харах үе байхад хамтрагч гэж харах үе илүү олон байдаг. Тэгэхээр хамтдаа хөгжье, цугтаа өөрчилье.

-Ярилцсанд баярлалаа.