Arslan.mn

Нийслэлийн цагдаагийн удирдах газрын Мөрдөн шалгах газрын Халаасны хулгайтай тэмцэх хэлтэс болон Нийслэлийн цагдаагийн удирдах газрын Урьдчилсан сэргийлэх хэлтэс, Нийтийн тээврийн үйлчилгээний компани хамтран Улаанбаатар хотод нийтийн тээврийн үйлчилгээ эрхэлдэг 20 ААН-үүдэд хяналт шалгалт хийжээ.

Шалгалтаар өнгөрөгч есдүгээр сарын 20-25-ны хооронд 1200 гаруй автобус, троллейбусны камеруудыг шалгасны 666-д нь зөрчил илэрчээ.

Шалгалтын баг нийтийн тээврийн үйлчилгээ эрхэлдэг 20 аж ахуй нэгжийн удирдлагуудтай өнөөдөр уулзаж, хяналт шалгалтаар илэрсэн зөрчлүүдийг нэг бүрчлэн тайлбарлаж, зөрчлийг 30 хоногийн дотор арилгах албан даалгавар өглөө.

Энэ талаар НЦУГ-ын Урьдчилан сэргийлэх хэлтсийн дарга Л.Амармөрөн "Нийтийн тээвэрт гурван жилийн өмнөөс нэг автобусанд 4-5 камер суурилуулсан. Эхний жилд камерын зөрчлийг илрүүлж сануулга өгсөн. Гэхдээ зөрчил дутагдал их.

1,202 автобусанд суурилуулсан камерт хийсэн шалгалтаар 606 зөрчил илэрсэн. Тухайлбал, Эдгээр зөрчилд DVR картыг эвдсэн, SD картыг сугалж авсан зэрэг зөрчил илэрсэн. Зөрчлийг арилгах сануулгыг автобус компанийн удирдлагуудад 30 хоногийн хугацаатай өгсөн. Албан шаардлагыг биелүүлээгүй тохиолдолд Зөрчлийн тухай хуулиар байгууллагыг нэг сая төгрөгөөр торгоно" гэлээ.

НЦУГ-ын Урьдчилан сэргийлэх хэлтсийн мэргэжилтэн, Цагдаагийн дэд хурандаа Б.Алтанзул " Нийтийн тээврийн жолооч нар иргэдээс бэлэн мөнгө авах, тамхи татах, утсаар ярих зэрэг шалтгаанаар камерт өөрчлөлт оруулж буй зөрчлүүд илэрсэн. Тиймээс өнөөдөр холбогдох нийтийн тээврийн үйлчилгээ эрхэлдэг байгууллагуудын удирдлага, төлөөлөлд зөрчлүүдийг танилцуулж, санал хүсэлтийг нь сонсоод албан шаардлага өгөх зөвлөгөөнийг зохион байгуулж байна." гэлээ.