Arslan.mn

Сүүлийн үед БНХАУ-ын иргэд хараа хяналтгүй улсын хилээр нэвтэрч байгаа гэх утгатай мэдээлэл цахим сүлжээнд тархсан. Энэ асуудалд цагдаагийн байгууллагаас хэрэг үүсгэн шалгаж эхэлснээс гадна УОК-оос өчигдөр хийсэн хэвлэлийн бага хурлын үеэр Шадар сайд Я.Содбаатар:

-БНХАУ-аас орж ирж байгаа ажиллах хүчинтэй холбоотой худал мэдээлэл явж байна. Монгол Улс ажиллах хүчин оруулж ирдэг тусгай хуультай, түүнийг хянадаг байгууллагатай. Монгол Улсад гаднаас ажиллах хүч оруулж ирэх асуудал төрийн бүрэн хяналтад байгаа. Ямар нэгэн хяналтгүйгээр, хэн нэгэн хүнийг тэр тусмаа шөнийн цагаар оруулаагүй. Мөн энэ жил маш бага хэмжээгээр буюу зөвхөн удирдах албан тушаалтан, инженер техникийн ажилтнуудыг гаднаас оруулж ирж байгаа. Ийм шаардлага нь ч Монгол Улсын нийгэм, эдийн засагт байгаа.

Бид долдугаар сар хүртэл ажиллах хүчийг оруулж ирэхийг хориглосонтой холбоотой бүтээн байгуулалтын маш олон ажил зогссон. Одоо бид Налайх, Дарханы замаас эхлээд цэвэрлэх байгууламж, хэд хэдэн эмнэлэгийн барилгыг бүрэн дуусгах хэрэгтэй байна. Энэ бүхэн дээр гадны ажиллах хүчин оруулж ирэх шаардлага гарч байна. Тэднийг оруулж ирж байж технологийн нарийн зүгшрүүлэлт хийх шаардлагатай. Олон улсын тендерт шалгарсан аж ахуйн нэгжүүдийн удирдах албан тушаалтнууд нь орж ирж байж, техник хэрэгслүүдээ хөдөлгөдөг.

Гадны ажиллах хүчийг маш хатуу хяналт доор, цөөн тоогоор, хоёр улсын гэрээ хэлэлцээрийн хүрээнд, хууль хүчний байгууллагын хяналт доор ажиллуулж байгаа. Засгийн газар өчигдөр он дуустал БНХАУ-аас орж ирэх ажиллах хүчний хөдөлгөөнийг зогсоосон. Гэтэл өчигдөр шөнө оруулж ирж байгаа мэтээр,өмнө нь орж ирсэн хүмүүсийг халдвар хамгааллын дэглэм сахиулаагүй мэтээр улс төржсөн агуулгаар мэдээлэл хийж байна. Иргэдийг төөрөгдүүлж, улстөрийн зорилгоор хандаж буй уг асуудалд хуулийн байгууллагаас арга хэмжээ авна. Энэ асуудалтай холбоотой худал мэдээллийг зохион байгуулалттайгаар цөөн тооны хүмүүс олон нийтийн сүлжээнд дэвэргэж байна гэсэн юм.

Тэгвэл БНХАУ-ын 74 иргэн өнгөрсөн 10 дугаар сарын 21-нд Замын-Үүдийн боомтоор орж иржээ. Тэд Монгол Тамхи со, Стандарт шуудай, Эм Эй ЖИ ЭЛ Ай ХХК, Ноён капитал, Томо бюлдинг, Дархан ээж шүтээн зэрэг компанийн урилгаар ирж байгаа гэж мэдүүлсэн байна. Тэдгээр 74 иргэнийг 10 автобусаар Монгол Улсын хилээр нэвтрүүлж хүлээлгэн өгчээ. 

БНХАУ-аас инженер техник, удирдах түвшний мэргэжилтнүүдийг зайлшгүй тохиолдолд оруулж ирж байгаа гэх. Тэгвэл дээрх компаниудын хүсэлтээр ирсэн ажилтнуудын мэдээлэлд ямар мэргэжилтэй ямар зориулалтаар ирж байгаа мэдээлэл бүрхэг байна. Түүнчлэн тамхи, оёдол зэрэг дотооддоо хийж болох, дотоодоос ажиллах хүчин татаж болох чиглэлд хятад ажилтнуудыг оруулж ирж байгаад багагүй шүүмжлэл дагуулж эхэлжээ. 

Эх сурвалж: shuurhai.mn

Б.ЗАЯА