Arslan.mn

Өчигдөр Франкфурт-Улаанбаатарын нислэгээр ирэх гэж байсан эмэгтэйгээс коронавирус илэрсэн учраас нислэгт багтаалгүй үлдээсэн гэх асуудал сошиал орчинд тархсан.

Энэ талаар ГХЯ-ны Консулын газрын дарга Л.Мөнхтүшиг “Франкфуртын өчигдрийн нислэгийн тухай сошиалд олон янзын мэдээлэл гарсан. Гадаадаас нутаг буцаж байгаа иргэдээс коронавирусийн халдварын шинжилгээ зайлшгүй авч байгаа. Өчигдөр Франкфуртын нислэгээр ирэх байсан 40 настай эмэгтэйн халдварын шинжилгээний хариу эерэг гарсан байсан. Бид энэ хүнийг бусдын эрүүл мэндийг эрсдэл оруулахгүй байх үүднээс онгоцонд суулгахгүй байх шийдвэр гаргасан.

Манай ЭСЯ түүний ар гэрийнхэнтэй нь холбогдсон. Тэрээр Чехээс ирсэн. Чехэд хамаатан садан нь байдаг. Түүнийг одоо Герман Улсад тусгаарлалтын байранд байлгах арга хэмжээг авч байгаа бөгөөд 14 хоног тусгаарлалтын байрнаас гаргахгүй байх зөвлөмж гарсан. ХБНГУ-д суугаа ЭСЯ онгоцны буудал дээр ажиллаж байгаа консулын ажилтнаараа дамжуулан тухайн иргэнийг Германд түр хугацаагаар байлгах арга хэмжээг авч байна” гэв.