Arslan.mn

Монгол Улсын Ерөнхийлөгчийн сонгуулийн санал хураалт өнгөрөгч долоо хоногт буюу зургаадугаар сарын 9-ний өдөр болж өнгөрсөн билээ. Санал хураалтын өдөр Зөрчлийн тухай хууль болон Монгол Улсын Ерөнхийлөгчийн сонгуулийн тухай хуулийг зөрчсөн хэд хэдэн хэрэг цагдаагийн байгууллагад бүртгэгдсэн байдаг.

Тэдгээрийн дунд иргэдийг цагаан сонголт хийхийг уриалан, санал өгөх байранд бичлэг хийж, саналын хуудсаа олон нийтэд харуулсан сошиал хэрэглэгч Б.Цэцэг багтжээ.

Түүний энэхүү үйлдэл нь хууль зөрчиж байгаа ба Сонгинохайрхан дүүрэг дэх цагдаагийн нэгдүгээр хэлтсээс Б.Цэцэгт Зөрчлийн хэрэг нээн, шалгаж эхэлсэн байна.

Хуульд зааснаар, сонгогч нь санал авах байрнаас саналын хуудас авч гарах, саналын хуудсанд тэмдэглэсэн санал болон бусад сонгогчийн тэмдэглэсэн саналыг баримтжуулан зураг авах, дүрс бичлэг хийх, шууд дамжуулах, бусдад харуулах нь хориотой байдаг.