Arslan.mn

Сошиал орчинд нэлээд хандалт аваад буй цагдаагийн алба хаагч эрхийн үнэмлэхгүй мотоцикл жолоодож явсан иргэн Д-гээс 200.000 төгрөг авчирч өгөхийг шаардаж, зодсон гэх үйл явдлыг хөндлөнгөөс харсан гэрчтэй ярилцлаа. 

Сайн байна уу?  Тухайн үед яг юу болсон талаар ярихгүй юу?

Би 2021 оны 06 дугаар сарын 20-ны өдөр Хэнтий аймгийн Бор-Өндөр сумын 4-р багийн орчмоор явж байхдаа сумынхаа залуу Д, түүний хамаатны дүү эмэгтэй Э нөхрийнхөө хамт гурвуулаа цагдаагийн алба хаагчтай маргалдаж байхад нь таарсан юм.

Тухайн үед Э цагдааг хэлэх, хэлэхгүй үгээр доромжлон биед нь халдаж гар устыг нь хүртэл авч шидэж байсан. Хэрэлдэж байхад нь түүний нөхөр утсаараа бичлэг хийж нэг ёсондоо цагдаагийн биед халдаж, эд хөрөнгийг нь эвдлэн сүйтгэж, хэл амаар доромжилж байхад салгаж болиулах ёстой байтал улам өөгшүүлэн утсаараа бичлэг хийж улам дэвэргэж байсан. 

Тухайн маргаан яг юунаас болж үүссэн юм болоо. Энэ талаар та мэдсэн үү?

Цагдаа залуу шалган нэвтрүүлэх пост дээр үүрэг гүйцэтгэж байсан юм билээ. Тэр үеэр манай нутгийн залуу  Д хамгаалалтын малгайгүй, улсын дугааргүй мотоцикл жолоодож явахад нь зогсоож шалгахад эрхийн үнэмлэх ч байхгүй явж байсан юм билээ. Тийм болохоор түүнийг цагдаагийн хэлтэс рүү авч явна. Эрхийн үнэмлэхгүй учир тээврийн хэрэгслээ жолоодож болохгүй түлхүүрээ өг гэж цагдааг шаардлага тавихад эсэргүүцэл үзүүлсэн учраас түүнийг гавласан. Тэгсэн чинь түүний дүү Э орилж хашхичин миний ахыг гавладаг чи хэн бэ? Ямар эрхтэй болоод миний ахыг гавлаж байгаа юм гэж орилж, хашхичин тэрүүгээр нэг юм болж цагдааг цохиж байсан.

Сошиал дээр тавигдсан мэдээлэл, постыг харахад тухайн иргэний зөв юм шиг санагдсан. Харин таны ярианаас сонсоход алба хаагчийн зөв байсан юм байна гэж бодогдлоо?

Сошиал орчин хөгжсөн нь малчин бид нарт мэдээ, мэдээллийг цаг алдалгүй авах, эргэн тойронд юу болж байгаа үйл явдлыг шуурхай мэдэж болдог гэж фэйсбүүк, сошиалд их идэвхтэй ордог юм. Харин өөрөө харсан зүйлээ яг эсрэгээр нь бичсэн байхыг уншаад сошиалд тавигдсан болгонд итгэж болохгүй юм байна гэдгийг л маш сайн ойлголоо. Магадгүй би тухайн үед хажууд нь байгаагүй бол Э-гийн бичсэн мэдээлэлд итгэх байлаа. Хэдийгээр түүнийг хэлтэй амтай гэдгийг нутгийнхан маань андахгүй ч тухайн мэдээлэлд нь итгээд түүний талд л орох байсан. Харин үнэхээр байж боломгүй авир гаргачхаад яг эсрэгээр нь гэм буруугүй мэтээр өөрийгөө өмөөрч  бичсэн зүйлийг нь уншаад өмнөөс нь ичиж байна. Тухайн үед надаас гадна тэр хавиар явж байсан машинтай иргэд хүртэл зогсож харж байсан. Тэр хүмүүс ч бас гэрчлэх байх.

Тухайн иргэнийг тэгж авирлаж байхад алба хаагч ямар нэгэн арга хэмжээ аваагүй юм уу?

Э орилж, хашхичин өнөөх цагдааг П.... минь гэх мэтээр харааж, цохиж байхад тухайн цагдаа би танд хууль ёсны шаардлага тавьж байна гэсэн. Эмэгтэй хүн болохоор магадгүй эсэргүүцэл үзүүлж, хүч хэрэглээгүй байх. 
Цагдаагийн алба хаагчид энгэрийн камер байдаг гэсэн түүнд нь тодорхой бичигдсэн байх. Тэр бичлэгээ тавьж үнэн байдлыг харуулах хэрэгтэй ш дээ. Дандаа бурууг цагдаад өгч өөрсдөө дүрэм, журмаа биелүүлэхгүй юм бол цагдаа байгаад ч яах юм.  Дуртай нь утсаараа бичлэг хийгээд, орилж, харааж зүхээд эмч, цагдаа нараа доромжлоод л эцэст нь өөрийгөө өмөөрсөн пост хийгээд л хамаг амьтнаар өрөвдүүлсэн хүн. Яг ажлаа хийж байгаад гүтгэлэг, доромжлол амссан хүн нь хамаг хүний хараалыг сонсоод, бурууг үүрээд байж болохгүй байх. Миний хувьд ийм шудрага бус зүйлтэй эвлэрч чадахгүй.

Эмч гэж та хэллээ эмч, эмнэлгийн ажилтан бас байсан хэрэг үү?  

Тийм. “Миний ахыг зодсон, Миний ах гэмтсэн” гэхэд нь тэнд байсан эмчид үзүүлэх гэтэл нөгөө эмэгтэй “чамд үзүүлэхгүй, өөр эмчид үзүүлнэ, Чи яг эмч мөн юм уу? Малын эмч юм биш үү?” гэх зэргээр эмнэлгийн ажилтныг хүртэл үг хэлээр доромжилж байсан. 

Өвчин зовлонтой хүнд хэцүү энэ цагт нойр хоолоо хугаслан бидний төлөө зүтгэж байгаа эмч, цагдаа нараа нохойноос дор үзэн гэр бүлээрээ нийлж доромжилж бүр биед нь халдаж, эд хөрөнгийг нь эвдэлж байгааг хараад иргэн хүний хувьд тэднийг өмөөрөх хэн ч байдаггүй юм байна гэж бодлоо. Бас тэднийг үнэхээр их өрөвдөж энэ ярилцлагыг өглөө.

Ярилцлага өгсөн танд баярлалаа.