Arslan.mn

Сүүлийн жилүүдэд автомашины зөөлөн яндан буюу хүмүүсийн хэлдгээр нүүрсэн янданг хулгайлах гэмт хэрэг нэлээдгүй бүртгэгдэх болсон. Нийслэлийн хэмжээнд Тоёота приус маркийн автомашины нүүрсэн яндан хулгайлах гэмт хэргийн гаралт буурахгүй байгаатай холбогдуулан Нийслэлийн цагдаагийн удирдах газрын Мөрдөн шалгах газрын Хулгайлах гэмт хэрэгтэй тэмцэх хэлтсийн ахлах мөрдөгч, цагдаагийн хошууч Ц.Буянзаяатай ярилцлаа.

-Энэ төрлийн гэмт этгээдүүдийг барьж, иргэдийн хохирлыг барагдуулах чиглэлийн сүүлийн үед авч хэрэгжүүлж байгаа ажлаас яриагаа эхлэе. НЦУГ-ын Мөрдөн шалгах газраас ямар арга хэмжээ авч хэрэгжүүлж байна вэ?

-Нийслэлийн цагдаагийн удирдах газрын Мөрдөн шалгах газар нь Улаанбаатар хотод тээврийн хэрэгслийн эд анги болох нүүрсэн яндан хулгайд алдагдсан хэргүүдэд дүн шинжилгээ хийн, мэдээ, мэдээлэл цуглуулан мөрдөн шалгах ажиллагаа явуулснаар энэ төрлийн гэмт хэрэг үйлддэг бүлэг этгээдүүдийг энэ сарын 20-21нд шилжих шөнө дайчлан баривчилж, мөрдөн шалгах ажиллагаа явуулж байна.

Мөн ченж гэх тодотголтой буюу гэмт хэргийн замаар орж ирсэн эд зүйлийг ашиг олох зорилгоор бусдад зарж борлуулдаг этгээдүүдийг илрүүлэн, шалгалтын ажиллагаа явуулж байна.

-Нүүрсэн яндан хулгайлах гэмт хэргийн гаралт буурахгүй байгаа шалтгаан нь юу вэ?

-Автомашины түүхий эд худалдан авдаг газрууд нүүрсэн янданг их хэмжээгээр төвлөрүүлж эрэлтийг бий болгон эргээд хоёроос гурав дахин нэмж зарж байгаа нь энэ төрлийн хулгайг улам өөгшүүлж байгаа юм.

-Тээврийн хэрэгслийн жолооч нар энэ төрлийн гэмт хэргээс хэрхэн урьдчилан сэргийлэх вэ?

-Гэмт хэрэг үйлдэж буй этгээдүүд гэрэлтүүлэг, камерын хяналтгүй гудамж талбайд байршуулсан автомашины эд ангийг хулгайлдаг. Иймд иргэд аж ахуйн нэгж байгууллагууд энэ төрлийн гэмт хэргээс урьдчилан сэргийлэхийн тулд өөрийн автомашиндаа дохиолол суурилуулж, харуул хамгаалалттай зогсоол, болон грашд  автомашинаа байрлуулах, Мөн тээврийн хэрэгслээ худалдан борлуулахдаа техникийн бүрэн бүтэн байдлаа өөрийн хараа хяналтан доршалгуулж худалдан борлуулах хэрэгтэй.

-Автомашины эд анги хулгайлсан этгээдэд хуулийн ямар хариуцлага тооцдог вэ?

-Хэрэв энэ төрлийн гэмт хэрэг үйлдсэн тохиолдолд тухайн этгээдийг Эрүүгийн хуулийн тусгай ангийн 17.1-д зааснаар “240-720 цаг хүртэл хугацаагаар нийтэд тустай ажил хийлгэх, эсхүл 6 сараас 5 жил хүртэл хугацаагаар зорчих эрхийг хязгаарлах, эсхүл 6 сараас 5 жил хүртэл хугацаагаар хорих ял шийтгэх”

Харин мөнгө угаах гэмт хэрэгт холбогдоод буй ченж нарт:

Гэмт хэргийн улмаас олсон хөрөнгө, мөнгө, орлого гэдгийг мэдсээр байж түүнийг авсан, эзэмшсэн, ашигласан, түүний хууль бус эх үүсвэрийг нь нуун далдлах, гэмт хэрэг үйлдэхэд оролцсон аливаа этгээдэд хуулийн хариуцлагаас зайлсхийхэд туслах зорилгоор өөрчилсөн, шилжүүлсэн, түүний бодит шинж чанар, эх үүсвэр, байршил, захиран зарцуулах арга, эзэмшигч, эд хөрөнгийн эрхийг нуун далдалсан бол зургаан сараас нэг жил хүртэл хугацаагаар зорчих эрхийг хязгаарлах, эсхүл зургаан сараас нэг жил хүртэл хугацаагаар хорих ял шийтгэнэ гэсэн хуулийн заалттай байдаг.

-Ярилцсанд баярлалаа.