Arslan.mn

Украинд үүсээд буй нөхцөл байдалтай холбоотойгоор тухайн улсад суралцаж байгаа оюутнуудын эцэг, эхчүүдийн төлөөлөл ГХЯ-ны албаныхантай уулзаж байна. 

Оюутнууд ус, хоол байхгүй айдаст автсан, "шок"-ын байдалтай байна. АТМ-үүдийнх нь мөнгө дууссан, утсаа ч цэнэглэж чадахгүй байгаа талаар ар гэрийнхэндээ дуулгажээ.

Энэ талаар эцэг эхийн төлөөлөл: "Яг одоо 27 оюутан маань метроны буудалд хоргодож байна. Тэд ус, хоол байхгүй айдаст автсан, "шок"-ын байдалтай байна. АТМ-үүдийнх нь мөнгө дууссан, утсаа ч цэнэглэж чадахгүй байна гэж байгаа. Гэтэл энд Гадаад харилцааны сайд, оюутнуудыг тавлаж доромжилдог Д.Болд дарга нь "Бүх юм зүгээр ээ" ухааны юм яриад зогсож байгаад үнэхээр гайхаж байна.

Нэг монгол оюутан метроны шат руу унаж мөр нь мултарсан. Тухайн үедээ их өвдөлтэй байсан уу, ухаан алдаж унасан байна. Тэнд байсан цагдаагийн ажилтнууд мултарсан мөрийг оруулахад тусалж, өөрсдийн цүнх хувцсаа эгнүүлж тавиад дээр нь хэвтүүлж байгаа гэнэ. Бүгд айж сандарсан, яахаа мэдэхгүй хүн байдалд байна" гэв.