Arslan.mn

Орон сууц нийтийн аж ахуйн удирдах газрын “Төв түгээх төв”-ийн машинист 22 настай Ц.Отгонбаяр нь бөөрний хүнд хэлбэрийн өвчин тусаж, бөөр шилжүүлэн суулгах шаардлагатай болжээ. Тус газрын Захиргаа хуулийн хэлтсийн дарга Д.Алтангэрэл, хүний нөөцийг мэргэжилтэн Э.Пагамдулам нар байгууллагынхаа залуу боловсон хүчний эрүүл мэндийг анхаарч эмчилгээний зардлыг олох хандивын аяныг ОСНААУГ-ын салбар төвүүдийн хэмжээнд зохион байгуулж байна.

Энэ тухай Э.Пагамдулам хэлэхдээ “Түүний биеийн байдал маш хүнд байгаа хагалгааны мөнгө нь л байвал амь насыг нь аврах бүрэн боломжтой. Түүний бөөр шилжүүлэн суулгах эмчилгээний зардалд 20 сая төгрөг хэрэгтэй байгаа юм. Тийм учраас манайх салбар төвүүдийнхээ 1800 гаруй ажилтан албан хаагчдын дунд “Хандивын аян” өрнүүлж хамт олных нь халуун дулаан сэтгэлийн дэмийг машинист Ц.Отгонбаяртаа хүргэж ажилтнаа эрүүл саруул болгохоор хичээн ажиллаж байна. Хандивын аяныг энэ долоо хоногийн даваа гаригаас эхлэн бүтэн долоо хоногийн турш зарласан байгаа. Ээжтэйгээ хоёулханаа орон сууцны “0” тоотод амьдардаг харж хандах хүнгүй өвдсөн ажилтныхаа тухай би байгууллагынхаа Захиргаа хуулийн хэлтсийн даргад хэлсэн. Д.Алтангэрэл дарга ч дэмжиж хандивын аян зохион байгуулах зөвшөөрлийг удирдлагуудын зүгээс гаргасан. Ер нь манай байгууллагын удирдлагууд ажилтнаа гэсэн сэтгэлтэй хүмүүс байдаг учраас ажилтандаа ээлтэй шийдвэрүүдийг үргэлж гаргадаг. Байгууллагаас олгох ёстой мөнгөн тэтгэмжийг олгосон байгаа Манай байгууллагын захиргаа ҮЭ-ийнхээ байгууллагатай байгуулдаг Хамтын гэрээгээр дамжуулж ажилтныхаа эрх ашгийг дээдэлсэн олон сайхан шийдвэрүүдийг гаргадаг.. Үүний нэг нь энэхүү аян юм. Өнөөдрийн байдлаар хандивын аяны дансанд маань дөрвөн сая орчим төгрөг цуглараад байна. Бид эмчилгээний зардлыг олж чадна гэсэн итгэлээ алдахгүй” хэмээн хэлэв.

Ц.Отгонбаярын хувьд 2015 оноос эхлэн “Хэрэглэгчдэд үйлчлэх үйлчлэх төв-5” засварчнаар ажилд орж хамт олныхоо итгэлийг алдахгүй хичээл зүтгэлтэй ажиллаж удаа дараа амжилт үзүүлж тушаал дэвшин “Төв түгээх төв”-д машинистаар ажилладаг болсон байна. Одоогийн байдлаар түүний биеийн байдал тун муу байгаа ба бөөрний хэвлийн диализын эмчилгээг хийлгэх явцдаа зүрхний дутагдалд орж уушгины хавсарсан усжилт хавантай болсон тул бөөр шилжүүлэн суулгах мэс ажилбарыг тун яаралтай хийх шаардлагатай байгаа ажээ.