Arslan.mn

Юнивишн ХХК өрхийн интернэт хэрэглэгчдийнхээ 50%-д IPv6-г нэвтрүүллээ

Бидний хэрэглэж буй бүх төхөөрөмж IP (интернэт протокол) хаягаар дамжин интернэтийн өргөн сүлжээнд нэвтэрдэг. Гэвч дэлхий нийтээр хэрэглэж буй IPv4 (Интернэт Протоколын 4-р хувилбар)-ын боломжит хаягийн хэмжээ ердөө 4.3 тэрбум ба энэ нь тун хязгаарлагдмал шавхагдаж буй нөөц юм. Тиймээс IP хаягийн дараагийн хувилбарт шилжих томоохон сорилт дэлхийн улс орнуудын өмнө тулгараад байна.

МОНГОЛ УЛС ЭНЭ ХӨГЖЛИЙН ХААНА ЯВНА ВЭ?

Дэлхий дахинд IPv6 нэвтрүүлэлт 43 орчим хувьтай үргэлжилж байна. Харин Монгол улсын хувьд 2022 оны 11 сарын байдлаар нийт гадаад урсгалд эзлэх IPv6-ийн хэмжээ ердөө 0.06% байсан бол Юнител групп өрхийн интернэт хэрэглэгчдэдээ шинэ хувилбарыг нэвтрүүлснээр энэ үзүүлэлт богино хугацаанд  25%-д хүрч, дэлхийн технологийн салбарынхны анхаарлыг татлаа.

Юнивишн ХХК нийт өрхийн интернэт хэрэглэгчдийнхээ 50 хувийг IPv6-д амжилттай нэвтрүүлсэн нь ийнхүү огцом өсөлтийг авчирч, олон улсад IPv6 нэвтрэлтийн хувиар Монгол улс аж үйлдвэрийн болон технологийн салбарт тэргүүлэх БНСУ, Филиппин, Сингапур, Итали улсуудыг ардаа орхисон юм.

IPV6 ЯМАР ДАВУУ ТАЛУУДТАЙ ВЭ?

• Дуусашгүй их нөөц

Өнөөдрийг хүртэл дэлхийд хамгийн өргөн ашиглагдаж буй IPv4 –ын боломжит хэмжээ дэлхийн хүн амын ердөө талд л хүрэлцээтэй бол IPv6 нь дэлхийн элсний ширхэг бүрийг хаяглаж болох асар их нөөцтэй.

• Интернэтийн хурд, үйлчилгээний чанар

IPv6-д интернэт пакетын бүтцийг илүү хялбарчилснаар видео, онлайн тоглоом зэрэг цахим орчин дахь хугацааны хоцрогдол багасаж, үйлчилгээний чанар сайжирна.

• Мэдээллийн аюулгүй байдал

Цахим орчин дахь кибер халдлагуудын эрсдэлийг эрс бууруулж, хэрэглэгчийн мэдээллийн аюулгүй байдлыг хангах чухал ач холбогдолтой.

• Хүрээлэн буй орчин

IPv4 хүртээмж бага байдгаас шалтгаалан дэлхийн бүхий л интернэт үйлчилгээ үзүүлэгчид NAT Network Address Translation технологийг ашигладаг. Тэгвэл IPv6 технологийг нэвтрүүлснээр NAT-ын ашиглалтыг 80 хүртэл хувиар бууруулж, үүнд зарцуулагддаг эрчим хүчний хэрэглээг төдий чинээ бууруулах юм.

• Эдийн засгийн үр өгөөж

Интернэт сүлжээнд холбогдож буй төхөөрөмжийн тоо хэмжээ жилээс жилд хурдацтай өсөн нэмэгдэж байна. Үүнээс шалтгаалан IPv4 хаягийн үнэ ч сүүлийн 5 жилийн хугацаанд 3 дахин өссөн. Тэгвэл Монгол улс ийнхүү IPv6-руу шилжсэнээр IPv4 хаяг гэх биет бус зүйлд зарцуулах гадаад валютын урсгалыг эх орондоо үлдээж байна.

Юнител групп IPv6 нэвтрүүлэлтийг цаашид ч үргэлжлүүлэх ба 2023 онд нийт хэрэглэгчдийнхээ 80 хувьд нэвтрүүлж, мобайл хэрэглэгч, байгууллагуудад мөн нэвтрүүлэхээр зорин ажиллаж байна. Ингэснээр Монгол улс Азийн топ 15 улсад багтаж, өрсөлдөх чадвар нэмэгдэх, эдийн засгийн эерэг нөлөө гээд олон боломжууд бидний өмнө нээгдэж байна.

Хамтдаа түрүүлж алхана.